Një djal 8-vjeçar shqiptar, i prekur nga tumori në kokë, i cili jeton në Norvegji, ka ngjallur interesin e mjaft mediave në këtë shtet.
Vogëlushi Alkeo Kastrioti vuan nga tumori në kokë, por ky nuk është i vetmi problem. Sipas mediave norvegjeze, më 16 korrik ai duhet të largohet nga ky shtet, pasi i është refuzuar azili. Shqetësimi që ngrihet lidhet me mungesën e trajtimit të duhur shëndetësor, nëse ai kthehet në Shqipëri.
Mjekë norvegjezë, por edhe kreu i Shoqatës Mjekësore për Fëmijë kanë pohuar se sistemi shëndetësor në Shqipëri është në gjendje të mjeruar, ndaj kanë bërë thirrje që djali me tumor, të qëndrojë në Norvegji. Kujdesi shëndetësor në Shqipëri është përshkruar nga ekspertët si katastrofë dhe i korruptuar.
“Alkeo, me shumë gjasa, nuk do të marrë shërbim, trajtim ose medikamente që ai ka nevojë. Është e domosdoshme që Alkeo të qëndrojë në Norvegji, për shkak të gjendjes së tij shëndetësore. Është çnjerëzore dhe jo etike që ai të niset për Shqipëri”, theksohet në deklaratën e kreut të shoqatës dhënë për mediat norvegjeze. Në të njëjtën mënyrë shprehet edhe nëna e vogëlushit, Dorjana, në lidhje me gjendjen e kujdesit shëndetësor në vendin tonë. Sipas saj, frika më e madhe është trajtimi i të birit dhe sipas saj, në Shqipëri është e vështirë që i biri të marrë mjekimin e duhur.
“Unë nuk besoj fare në sistemin shëndetësor shqiptar”, është shprehur Dorjana. Ajo shton më tej se u detyruan që të vinin në Norvegji për shkak të nevojave të të birit. Ndërsa një mik i familjes është shprehur në këtë mënyrë: “Në Shqipëri nuk është asgjë pa pagesë, çdo gjë kushton shumë. Spitalet publike janë të varfra. Atje luhet me shëndetin e popullit”. Veç kësaj, në mediat norvegjeze thuhet se 8-vjeçari nuk ka përse të vuajë pasojat e veprimeve të prindërve të tij. Sipas tij, në Shqipëri, trajtimi do të jetë i kufizuar dhe Alkeo nuk ka përgjegjësi që prindërit e tij vendosën të vijnë në mënyrë të paligjshme për të kërkuar azil.
