UPDATE/ Me rifillimin e seancës plenare debatet kanë vijuar edhe për pak minuta, por më pas gjithçka është qetësuar. Deputeti Flamur Noka është larguar nga salla e parlamentit, pas vendimit të zv kryetares së kuvendit Leskaj për ta përjashtuar.
Por… pavarësisht se fjalën e kishte Kryeministri… podiumin e kishte “zaptuar” Berisha, i cili nuk ka lëvizur nga vendi. Leskaj i ka kërkuar Berishës që të lirojë vendin, që të flasë kryeministri (sipas regullores së parlamentit, një kryeministër mund ta marrë fjalën kur të dëshirojë dhe pa rradhë), por sërish deputetët e opozitës janë ngritur në këmbë. Për të qetësuar situatën Rama dhe Leskaj i kanë “hapur rrugën” Berishës, në mënyrë që seanca të hynte në shina normale.
NDËRPRITET SEANCA, LESKAJ- NOKËS: JE I PËRJASHTUAR!
Edhe pas pushimit për disa minuta të seancës plenare, përsëri opozita nuk ka “zbrazur” podiumin dhe ka vijuar të qëndrojë aty. Madje, Kryeministri Edi Rama i është drejtuar karrikes së tij, teksa vendin në podium e ka “pushtuar” Sali Berisha. Të gjithë deputetët opozitarë kanë qëndruar në këmbë, teksa Flamur Noka ka vijuar të hedhë fjalë drejtuar kryeministrit.
Në këto kushte, zv kryetarja e kuvendit Valentina Leskaj, pasi i ka lexuar rregulloren Flamur Nokës, i cili nuk është ulur në vendin e tij, ka kërkuar përjashtimin e deputetit nga seanca plenare.
Sërish, senca është ndërprerë.
…………….
NOKA NUK LEJON RAMËN TË FLASË: FLET BERISHA PASTAJ TI!
Sërish tensione në parlament, dhe kësaj here me po të njëjtin argument, që flet Sali Berisha, pastaj të tjerët… deputeti Flamur Noka është çuar nga vendi i tij dhe ka bllokuar foltoren.
Demokrati nuk ka lejuar Kryeministrin Rama që të flasë, duke thënë se “në fillim flet Sali Berisha dhe pastaj ti!”
Edhe deputetët e tjerë të PD janë ngritur në këmbë teksa garda i është afruar podiumit të parlamentit.
Valentina Leskaj është detyruar që të ndërpresë për herë të dytë seancën parlamentare, pas incidentit të disa minutave më parë ku kreu i grupit parlamentar të PD Paloka nuk lejoi të flasë Ministrin e Shëndetësisë Ilir Beqaj, madje edhe duke e shtyrë nga aula.
