Nënkryetari Flamur Noka e ka mbledhur sërish komisionin e Sigurisë Kombëtare në lidhje me atë që demokratët e kanë cilësuar si një skandal kombëtar
Noka tha se u kërkuan sqarime nga Tahiri, Llalla, Ajazi dhe Çako, si persona që kanë dijeni për çështjen e përgjuesit të policisë.
“Vendosëm që thirrjen e drejtuesve të lartë për të raportuar ta votojmë në Komision. Presidenti e pranoi ekzistencën e pajisjes, ndërsa Tahiri dha disa versione. Ne gjykojmë që çështja e përgjimit është skandal” – tha deputeti demokrat.
Sipas tij, pajisja që posedon policia e shtetit kushton 800 mijë euro dhe ka hyrë në rrugë të jashtëligjshme në vendin tonë. Nënkryetari i Komisionit të Sigurisë, që drejton punimet përkohësisht në mungesë të Spartak Brahos, tha se sipas informacioneve që ai, ka pajisja përgjon edhe me telefon të fikur.
Në mbledhjen e sotme ka reaguar edhe deputeti i LSI, Luan Rama. Ai tha se ka një mospërputhje mes asaj që thotë Presidenti dhe deklaratave të ministrit.
“Është e drejta ime të prezumoj të pavërtetën në këtë çështje” – mësohet të ketë thënë Rama.
Ndërkohë, Piro Lutaj u shpreh se zhurma nuk i shërben zbardhjes së kësaj çështjeje. (javanews.al / r.a)
