Polemika është servirur. Gjashtë muaj para fillimit të “Katar 2022”, një skandal mund të trondisë kompeticionin madhor, pasi Federata Kiliane e Futbollit denoncoi parregullsi serioze në procedurën e Ekuadorit gjatë fazës kualifikuese për Kupën e Botës. Ekuadori me sa duket do të kishte fshehur identitetin e vërtetë të një prej lojtarëve të vet të thirrur: Bayron Castillo.
Avokati i Federatës Kiliane të Futbollit, Eduardo Carlezzo zbulon për “MARCA” të gjitha parregullsitë e kombëtares ekuadoriane, me Bayron Castillo që pohon se po luan me dokumentacion totalisht fals, duke deklaruar se është vërtet kolumbian.
Kili e ka denoncuar tashmë atë në FIFA dhe kërkon kualifikimin e tij në Kupën e Botës 2022. Kujtojmë se Bayron Castillo ka luajtur tetë ndeshje me Ekuadorin në fazën kualifikuese për Botërorin e këtij viti, dy prej tyre kundër Kilit.
“Ne kemi bërë një ankesë në FIFA si rezultat i asaj që besojmë se është incident shumë i rëndë në thirrjen e lojtarit Byron Castillo me ekipin kombëtar të Ekuadorit. E kemi hetuar tërësisht rastin për të kuptuar realisht se ku ka lindur lojtari dhe ne jemi të qartë: ka lindur në Kolumbi”, – tha Eduardo Carlezzo për “Marca”.
Dokumenti i skandalit – “Ajo që po theksojmë kategorikisht është se Byron Javier Castillo Segura ka lindur në Tumaco të Kolumbisë, më 25 korrik 1995. Byron David Castillo Segura, i cili do të kishte lindur më 10 nëntor 1998, nuk ekziston, ai është një fantazmë. Ai është një falsifikim dhe madje krim sipas ligjeve të Ekuadorit”, – shtoi avokati i “La Roja”.
Epiqendra e falsifikimeve dhe provat – “Çështja ka një narrativë shumë solide, të bazuar në dokumente që tregojnë se si filloi falsifikimi i dokumenteve në Ekuador. Duhet të keni parasysh se e gjitha kjo fillon me një skemë shumë të thellë të falsifikimit të dokumenteve të lojtarëve. Gjithçka filloi më 2012 në provincën e Guayas (provinca e Ekuadorit) me një klub të quajtur Norte América.
Pikërisht Byron Castillo është regjistruar në atë klub në vitin 2012. Vetë federata ekuadoriane e ka emëruar këtë klub si epiqendrën e falsifikimit të dokumenteve të lojtarëve në Ekuador dhe është pezulluar. Më vonë, për këtë u arrestuan disa punonjës”, – pranon Eduardo Carlezzo.
Byron Castillo ishte gjithmonë në sytë e Ekuadorit. Federata e këtij vendi ishte e vetëdijshme për të gjitha këto. “Bayron Castillo duhet të thotë të vërtetën, të dalë dhe të thotë se ka një vëlla apo ta publikojë në rrjetet e tij sociale, që të jetë i qartë”, – thotë avokati i Kilit.
Federata Kiliane ka kërkuar gjithashtu një seancë dëgjimore me FIFA-n për t’u ulur me lojtarin Byron Castillo për shkak të seriozitetit të incidentit. Lojtari nuk ka folur kurrë për këtë, ndaj është me rëndësi të dëgjohet. Deri më tani, FIFA nuk i është përgjigjur ankesës.
A mundet Kili të luajë Kupën e Botës? “Katar 2022” është pothuajse afër dhe kombëtarja kiliane shpreson që FIFA të pajtohet me të, ta skualifikojë Ekuadorin për falsifikim. Kombëtarja e Kilit është e befasuar nga ky skandal që ka prekur Botërorin pak muaj para fillimit të tij. Ajo shpreson që zgjidhja të jetë e shpejtë dhe e favorshme për interesat e veta.
