Gjermania është kthyer në destinacionin kryesor të emigrimit të shqiptarëve vitet e fundit. Plot 27 mijë shqiptarë mësohet se janë zhvendopsur në këtë vend, në kërkim të një pune dhe jete më të mirë. Nisur nga ky fluks, Gjermania po mundohet t’i lehtësojë disa procedura për punësimin e tyre, nisur edhe nga nevojat e saj për krah pune të kualifikuar.
Në kuadrin e vizitës së kryeministrit Edi Rama në këtë vend, ambasada gjermane në Tiranë ka zbuluar detajet mbi njohjen e patentave tona në shtetin lokomotivë të Europës. Nënshkrimi i marrëveshjes së përbashkët në Tiranë mes Sekretarit Parlamentar të Shtetit pranë Ministrisë Federale për Zhvillimin Digjital dhe Infrastrukturën, Oliver Luksic, dhe Ministres për Energjinë dhe Infrastrukturën shqiptare, Belinda Balluku, ka hapur rrugën për njohjen reciproke të lejeve të drejtimit të automjeteve.
Ja njoftimi i ambasadës gjermane: “Zotëruesit e një lejeje drejtimi të kategorive A, A1, A2, B, BE, C, C1, C2, D, D1, D2 (motorr, veturë, kamion, autobuz), të lëshuara pas datës 24 janar 2017, mund të bëjnë konvertimin pa qenë nevoja e një provimi të ri.
Kjo vlen për shtetas me rezidencë në Gjermani (qëndrimi në Gjermani për të paktën 185 ditë në vit). Përmes kësaj marrëveshjeje për bashkëqytetarët/et shqiptarë/e në Gjermani krijohet mundësia e një aksesi të sigurt ligjor në tregun e punës, për të cilin shpesh leja e drejtimit të automjeteve është kriter i rëndësishëm.
Për Gjermaninë kjo njohje përfaqëson një zhvillim të rëndësishëm në mënjanimin e mungesave të fuqisë punëtore të kualifikuar”.
/a.r
