Të enjten, do të mbahet takimi i dytë në nivel presidentësh në Bruksel ndërmjet Kosovës dhe Serbisë. Këtë takim të presidentit të Kosovës, Hashim Thaçi, dhe atij të Serbisë, Aleksandër Vuçiç, e ka paralajmëruar përfaqësuesja e lartë BE-së për politikë të jashtme dhe siguri, Federica Mogherini.
Në njoftim të zyrës së BE-së, thuhet se të dyja do të shkëmbejnë pikëpamjet rreth vazhdimit të dialogut për normalizimin e marrëdhënieve mes Kosovës e Serbisë, pas marrëveshjes së korrikut për të filluar përgatitjen e një faze të re të dialogut.
Sipas këtij njoftimi, temë diskutimi në takimin e presidentëve Thaçi e Vuçiç do të jetë edhe zbatimi i marrëveshjeve të arritura në Bruksel. “Këtë javë do t’i takoj sërish presidentët Vuçiq dhe Thaçi, për të shtyrë përpara dialogun në mes të Beogradit dhe Prishtinës.
Mendoj se mundemi që deri në fund të këtij mandati të arrijmë qëllimin në kërkim të hapave konkretë dhe të rëndësishëm për secilin nga partnerët tanë ballkanikë në rrugën e tyre drejt integrimit në Bashkimin Evropian”, ka thënë Mogherini.
Në një fjalim para ambasadorëve të vendeve të BE-së, Mogherini ka thënë se pavarësisht disa tensioneve në Ballkan, këto vende kanë dëshmuar vullnetin dhe dëshirën për përparime në rrugën drejt BE-së.
“Këtë vit në Ballkan kemi qenë dëshmitarë të tensioneve në rritje në kohë dhe shtete të ndryshme. Por, përfundimisht partnerët tanë në Ballkan kanë qenë gjithmonë në gatishmëri për të treguar përkushtimin e tyre dhe afërsinë për të qenë më afër BE-së”, ka thënë ajo.
Takimi i parë në nivel presidentësh ndërmjet Kosovës dhe Serbisë ishte mbajtur më 3 korrik në Bruksel, përgatiti Koha. (b.an)
