Në stendën e njoftimeve në murin rrethues të Ambasadës Ruse në Tiranë është varur prej disa orësh një dyfaqësh me okelion “njoftim për shtyp”.
Me një gjuhë që të kujton luftën e ftohtë të dikurshme, Ambasada fton mediat shqiptare të mos ribotojnë pa u menduar materialet e shtypit perëndimor lidhur me atë që po ndodh në Siri – raporton Dita.
“Në mediat perëndimore vazhdon vala e dezinformimit dhe insinuative në lidhje me operacionin e forcave ajrore të Rusisë në Siri – thotë njoftimi dhe shton pak më tej: “Për fat të keq në shtypin shqiptar mbizotërojnë kryesisht ribotimet e shtypit perëndimor”
Njoftimi merr në shenjë në rreshtat e mëpasëm, joefikasitetin e luftës amerikane në Siri dhe Irak duke thënë që koalicioni i drejtuar nga amerikanët jo vetëm nuk e ka pakësuar por e ka shtuar numrin e terroristëve
“Shumë pyetje ngrihen edhe ndaj efikasitetit të veprimeve të koalicionit kundër ISIS nën udhëheqjen e SHBA-ve jo vetëm në Siri por edhe në Irak. Si rezultat i operacioneve të koalicionit, numri i luftëtarëve të ISIS vetëm është rritur” – lexohet në këtë njoftim.
Jo vetëm kaq, por njoftimi arrin deri aty sa aludon se mosbashkëpunimi i amerikanëve me rusët dhe sirianët do të thotë që amerikanët realisht nuk e duan zhdukjen e ISIS.
“Në lidhje me këtë është krejtësisht e paqartë pse pjesëmarërsit e koalicionit udhëhequr nga SHBA-të refuzojnë të bashkëpunojnë me palën ruse dhe ushtrinë siriane. Mos i tremben faktit se si rezultat i këtij bashkëpunimi ushtria siriane do ta pastrojë vendin nga terroristët?” – pyet njoftimi që mbyllet me ftesën për mediat shqiptare që të kontaktojnë ambasadën ruse nëse duan të shkruajnë për atë që po ndodh realisht në Siri. / Dita /
