Dy vëllezër të dënuar për trafik të lëndëve narkotike janë vënë sot në sitën e Operacionit Forca e Ligjit dhe kanë 48 orë për të deklaruar pasurinë. Auto-deklaratat e tyre do t’i dërgohen më tej Prokurorisë së Posaçme ku pritet që brenda 15 ditëve të merret vendimi për sekuestro nëse a ka dyshime se pasuritë janë vënë nga burime të paligjshme.
Ervis Gavelli dhe Leonat Gavelli, të dy banues në Berat sipas OFL-së rezultojnë të dënuar për veprën penale “Trafikim i lëndëve narkotike”.
Në 2015-ën, kur ishte 42 vjeç, Leonat Gavelli u mor peng nga persona të armatosur tek Kodrat e Liqenit të thatë në Tiranë, por u la i lirë 8 orë më pas, pa asnjë lëndim nga autorët, të cilët qëllim kishin vetëm t’i jepnin një mesazh kërcënues.
Vetë Gavelli para policisë tha se personat ishin bindur që kishin ngatërruar person dhe e kishin lënë të lirë. Edhe pse dyshimet e bluve në atë kohë ishin se rrëmbyesit kanë kërkuar vëllain e Gavellit, i cili ndodhej jashtë vendit.
Leonat Gavelli është dënuar nga autoritetet italiane si drejtues në një rrjet të trafikut të kokainës nga Kolumbia dhe destinacion tregun e narkotikëve në Zvicër dhe Itali.
Një dosje për Gavellin dhe bashkëpunëtorët e tij shqiptarë ka ardhur në drejtim të Shqipërisë nga autoritetet italiane në vitin 2007, ku thuhej se kokaina sigurohej në Kolumbi nga Leonart Gavelli, dhe më tej ia dorëzonte vëllait dhe kushëririt në Itali.
Për shkak të sofistikimit që kishte ky rrjet i trafikut të drogës, autoritetet italiane mundën të kapin vetëm 3.5 kilogramë kokainë nëpërmjet përgjimeve, e trafikuar nga Kolumbia në Itali gjatë periudhës 2003-2004.
g.kosovari
