Një vit ka kaluar nga aksidenti tragjik me motor që i mori jetën Eldion Kelmendit, vëllait të Gjestit. Në ditën përkujtimore, rrjetet sociale janë mbushur me fotografi dhe dedikime për të ndjerin, por mënyra se si disa persona kanë zgjedhur ta përkujtojnë ka shkaktuar reagimin e ashpër të familjes.
Blerina, motra e Gjestit, ka reaguar publikisht përmes Instagramit, duke kritikuar ata që kanë publikuar fotografi pranë varrit të Eldionit apo mesazhe të gjata për humbjen e tij.
Ajo ka kërkuar që dhimbja e familjes të mos kthehet në material për publikime në rrjetet sociale dhe ka qenë veçanërisht e drejtpërdrejtë në mesazhin e saj.
“Unë nuk mund ta kuptoj se si mund të jenë njerëzit pa ndërgjegje e pa pikën e respektit. Çfarë doni të tregoni me foto te varri e me ato referate që i shkruani në rrjetet sociale? Unë veç di t’ju them: Marre ju qoftë! ‘Kishe po bëjmë diçka’, duke bërë filma – kjo vlen për të gjithë ju që sot po e bëni këtë gjë”, ka shkruar ajo.
Blerina nuk është ndalur me kaq. Në një tjetër postim, ajo ka kundërshtuar sërish ekspozimin publik të humbjes së vëllait, duke theksuar se dhimbja, sipas saj, nuk ka nevojë të dëshmohet përmes fotografive, videove apo dedikimeve publike.
“Dhimbja nuk tregohet në rrjetet sociale me foto, me video e me shkrime. Kjo është krejt vëmendje që doni të keni, por jo me këto lloj gjërash, jo”, është shprehur motra e Gjestit.
Reagimi i saj vjen në një ditë veçanërisht të dhimbshme për familjen, pikërisht kur mbushet një vit nga ndarja tragjike e Eldionit nga jeta.
Për Blerinën, përkujtimi i të ndjerit nuk duhet të shndërrohet në ekspozim publik të dhimbjes. Përmes mesazheve të saj, ajo ka kërkuar që familja dhe humbja e Eldionit të respektohen, duke shmangur publikimet që, sipas saj, bëhen më shumë për vëmendje sesa për të nderuar kujtimin e tij.
