Një grup letrash dhe fotografish të papublikuara më parë, që lidhen me Jeffrey Epstein-in, u bënë publike të martën nga New York Times, duke rihapur vëmendjen ndaj një prej skandaleve më të mëdha të dekadës së fundit.
Letra të shumta nga figura të fuqishme dhe të njohura – përfshirë politikanë, miliarderë, akademikë dhe artistë – u zbuluan si pjesë e një dhurate për ditëlindjen e 63-të të Epstein-it në vitin 2016. Publikimi i tyre ndodh ndërsa rritet spekulimi për lidhjet mes Epstein-it dhe presidentit amerikan Donald Trump.
Në një nga letrat, ish-kryeministri izraelit Ehud Barak dhe bashkëshortja e tij i shkruanin Epstein-it: “Ti je si një libër i mbyllur për shumë, por di gjithçka për të gjithë… një koleksionist njerëzish.”
Regjisori Woody Allen përmendte darkat e organizuara nga Epstein si “gjithmonë interesante”, ku merrnin pjesë “politikanë, shkencëtarë, magjistarë, gazetarë dhe madje edhe anëtarë të familjeve mbretërore”. Ai përmend gjithashtu se shërbimi shpesh bëhej nga “vajza të reja” që i kujtonin skenat nga “Drakula”.
Emra të tjerë që rezultojnë të kenë dërguar letra janë miliarderi i medias Mortimer Zuckerman, akademiku Noam Chomsky me bashkëshorten, drejtuesi i atëhershëm i MIT Media Lab Joichi Ito, fizikani Lawrence Krauss dhe biologu i Harvardit Martin Nowak. Shumica nuk kanë pranuar të komentojnë.
Fotografitë nga vila shtatëkatëshe e Epstein-it në Manhattan tregojnë detaje të pazakonta dhe të dyshimta: një tigër i balsamosur, një kopje e rrallë e romanit kontrovers Lolita, kamera sigurie në dhomën e gjumit dhe piktura nudo në dhomën e masazheve – vendi ku dhjetëra viktima kanë dëshmuar se janë abuzuar seksualisht.
Në shtëpi gjendeshin gjithashtu fotografi me figura të njohura si Ghislaine Maxwell, Papa Gjon Pali II, Mick Jagger, Elon Musk, Fidel Castro, Bill Clinton, Richard Branson, princi saudit Mohammed bin Salman dhe ish-këshilltari i Trump-it, Steve Bannon.
Një dollar i firmosur nga Bill Gates me mesazhin “I was wrong!” ishte po ashtu i ekspozuar.
Sipas New York Times, në hyrje të vilës ndodheshin sy protetikë të vendosur në korniza dhe një skulpturë e një gruaje me fustan nusërie të varur në atriumin qendror.
Epstein vdiq në burg në vitin 2019 ndërsa priste gjyqin për akuza të trafikut seksual. Zyrtarisht, vdekja u cilësua si vetëvrasje, por ajo ka ushqyer teoritë konspirative për vite me radhë, për shkak të lidhjeve të tij me njerëz të pushtetshëm.
Departamenti Amerikan i Drejtësisë, që fillimisht premtoi transparencë, ka deklaruar së fundmi se nuk do të publikojë më dokumente shtesë mbi rastin, gjë që ka nxitur reagime të ashpra, përfshirë nga vetë mbështetës të Trump-it.
Për më tepër, është raportuar se emri i Trump-it figuron në dosjet e Epstein-it dhe se ai i kishte dërguar një kartolinë ditëlindjeje në vitin 2003. Trump e ka mohuar këtë dhe ka paditur Wall Street Journal për shpifje.
Ndërkohë, zëvendësprokurori i përgjithshëm i SHBA-së ka zhvilluar një takim dy-ditor me Ghislaine Maxwell në korrik, për të hetuar nëse ajo ka informacion mbi të tjerë persona të përfshirë në abuzime. Maxwell u transferua më pas në një burg me siguri më të ulët në Teksas.
Artikulli origjinal: https://www.nytimes.com/2025/08/05/us/jeffrey-epstein-mansion-photos.html
