Policia e Malit të Zi sapo ka konfiskuar mbi një ton kokainë, sasia më e madhe e drogës e zbuluar ndonjëherë në këtë shtet. Droga ishte fshehur në një dërgesë me banane.
Policia malazeze ka arrestuar dy persona. Bastisja u krye në Mojanoviq, një lagje në periferi të kryeqytetit Podgorica.
“Ne po bëjmë atë që kemi premtuar: Mali i Zi nuk do të jetë vend i krimit”, shkroi në Twitter zëvendëskryeministri i Malit të Zi, Dritan Abazoviç.
Mali i Zi është shtet anëtar i NATO-s dhe ka hapur negociatat për anëtarësimin në Bashkimin Evropian. Përpara se t’i bashkohet BE-së, ky shtet ashtu si edhe shtetet e tjera të Ballkanit Perëndimor ka për detyrë të luftojë trafikun e drogës, të armëve, të çrrënjosë krimin e organizuar dhe korrupsionin.
