Shteti federal amerikan i Misurit është i pari që ndërmerr procedura ligjore kundër Kinës, duke bërë përgjegjëse qeverinë e këtij vendi për përhapjen e pandemisë së koronavirusit në gjithë globin.
Nisma është ndërmarrë nga prokurori i përgjithshëm i këtij shteti federal, i cili tha se Kina ka bërë shumë pak për të frenuar përhapjen e virusit, që si vatër ka qytetin e Uhanit. Në padi thuhet se Kina është përgjegjëse për dëmet e konsiderueshme që po i shkaktojnë biznesit lokal, masat e ashpra kundër përhapjes së Covid-19. Ndaj dhe aty kërkohet dëmshpërblim nga qeveria kineze.
Por zyrtarët e ministrisë së jashtme në Pekin i konsideruar akuzat si absurde dhe pa asnjë bazë ligjore. Sipas tyre, bazuar në parimin e sovranitetit, gjykatat amerikane nuk kanë asnjë juridiksion mbi qeverinë e Kinës. Ekspertët ligjorë thonë se parimet ndërkombëtare u ofrojnë qeverive të huaja, imunitet ndaj padive të ngritura në gjykatat e Shteteve të Bashkuara.
Disa liderë perëndimorë si presidenti amerikan Donald Tramp e ai francez Emanuel Makron kanë akuzuar haptazi Kinën si shkaktare të pandemisë globale për shkak të keqmenaxhimit të situatës që në nisje duke paralajmëruar edhe masa ligjore përmes gjykatave ndërkombëtare. Po shtohet shumë edhe presioni ndaj kancelares Merkel për të kërkuar dëmshpërblim nga Kina, për pasojat negative që i ka shkaktuar ekonomisë së këtij vendi pandemia. Sipas një përllogaritjeje të tabloidit gjerman Bild, fatura që i Kina i ka borxh Gjermanisë është 149 miliardë euro, kjo nëse Prodhimi i Brendshëm Bruto i vendit bie me 4.2% si pasojë e kësaj situate.
