Një profesor italian që mbahet prej dy muajsh në burgun e Fierit ka sjellë shqetësimin e deputetëve italianë tek presidenti Bajram Begaj. Michele D’Angelo, 44 vjeç, profesor biologjie në Universitetin e Aquila dhe një shkencëtar me famë ndërkombëtare po mbahet në burg pas një incidenti rrugor në 8 gusht në rrugën Levan – Fier, raportojnë mediat italiane.
Autoritetet shqiptare e kanë akuzuar për dhunim të rregullave të qarkullimit rrugor dhe “braktisje të mjetit”. Mediat italiane i bëjnë jehonë rastit duke thënë se mund të kthehet në një çështje ndërkombëtare.
Autoritetet e universitetit kanë kërkuar ndihmën e parlamentarëve italianë. Deputeti Luciano D’Alfonso flet për masa joproporcionale për burgosjen e profesorit shkencëtar. Deputeti ka kontaktuar personalisht presidentin Bajram Begaj për ti kërkuar kthimin e profesorit menjëherë në itali.
Incidenti që ka ndodhur në 8 gusht ka përfshirë makinën e profesorit dhe një mercedez të shtetasit shqiptar E.S që dyshohet sipas medias italiane se ka humbur kontrollin e makinës ndërkohë që i jepte me shpejtësi. Sipas dëshmitarëve afër profesorit “ai po ecte me 40 km në orë dhe u gjend përballë një makine tjetër që ecte me shpejtësi dhe nuk mund ta shmangte.
Deputeti D’Alfonso ka prezantuar në 19 shtator një memo për presidentin Bajram Begaj. “Profesori është vendosur menjëherë në dispozicion të autoriteteve shqiptare citohet në dokument. Për parlamentarin, situata është e rëndë dhe kërkon një përgjigje të shpejtë.
Nuk dihet se cila është përgjigja që do të japin për këtë çështje autoritetet shqiptare, por tanimë, është e qartë se një profesor shkencëtar biologjie në Itali, gjendet në Burgun e Fierit për një aksident rrugor në Shqipëri.
