Nga Enver Robelli
Presidenti amerikan ofendon ushtarët polakë (dhe ata britanikë), duke injoruar njëkohësisht rolin e tyre si aleatë të SHBA-së në Afganistan dhe Irak.
Kryetari i Parlamentit të Polonisë thotë se presidenti amerikan nuk e meriton çmimin Nobel.
Pastaj ambasadori amerikan në Varshavë deklaron se do të ndërpres të gjitha kontaktet me kryetarin e Parlamentit të Polonisë.
Reagon kryeministri polak Donald Tusk me kërkesën dashamirëse ndaj ambasadorit se “aleatët duhet të respektojnë njëri-tjetrin dhe jo të japin leksione.
Të paktën këtu në Poloni, kështu e kuptojmë partneritetin”.
Në rrjetin X deputeti i Sejmit, parlamentit polak, Roman Giertych iu drejtua me këtë letër ambasadorit amerikan në Varshavë:
“I dashur zoti Ambasador,
qëndrimi juaj se nuk do të mbani marrëdhënie me Włodzimierz Czarzastyn, i cili është zgjedhur nga një shumicë parlamentare që përfaqëson shumicën e polakëve, është thjesht i papranueshëm.
Kohët kur ambasadorët u diktonin polakëve se kush duhej të mbante çfarë posti në Poloni kanë marrë fund dhe nuk do të kthehen më kurrë. Ne duam marrëdhënie të mira me Shtetet e Bashkuara, por përfaqësuesit tuaj nuk do t’i zgjedhin për ne autoritetet e Republikës së Polonisë.
Unë kurrë nuk kam qenë adhurues i (kryetarit të Parlamentit) Włodzimierz Czarzastyt, por në këtë çështje, si deputet, qëndroj fuqishëm në krah të tij.
Presidenti juaj fillimisht ka fyer ushtarët polakë dhe më pas kërkon mbështetje për ëndrrat e tij për të marrë Çmimin Nobel.
Kohët kur Neroni, nën kërcënimin e ndëshkimit, kërkonte njohje për talentet e tij muzikore, konsiderohen si fillimi i rënies së Perandorisë Romake.
Nga perspektiva polake, përpjekjet e Donald Trumpit për t’u shpërblyer me Çmimin Nobel për Paqe, ndërkohë që mban të varur një fotografi të tij me kriminelin më të madh të kohës sonë – Putinin – janë të ngjashme me kërkesat e Neronit për çmime dhe lavdërime.
Nëse nuk ju pëlqejnë autoritetet polake, ju lutem ndërroni punë. Në Poloni, polakët do të vendosin në mënyrë demokratike se kush mban postet më të larta. Ju lutem pajtohuni me këtë.
Dhe ju lutem, i thoni Presidentit tuaj t’u kërkojë falje ushtarëve polakë, dhe veçanërisht familjeve të atyre heronjve tanë që ranë duke kryer një mision mbrojtës të NATO-s.
Me respekt,
Roman Giertych”.
