Sekretari i përgjithshëm i NATO-s, Jens Stoltenberg, i cili po qëndron për vizitë dyditore në Maqedoni, sot në Parkun e Qytetit të Shkupit ishte i pranishëm në ceremoninë me rastin e emërtimit të një prej rrugëve të qytetit për nder të babait të tij, Torvald Stoltenberg, i cili është edhe Qytetar Nderi i Shkupit.
Kryetari i bashkisë së Shkupit, Petre Shilegov tha se këtë vit është 55-vjetori i tërmetit katastrofik që goditi qytetin e Shkupit në vitin 1963, duke shtuar se kjo është edhe viti lamtumirës me mikun e Shkupit, Torvald Stoltenberg.
Shilegov tha se është nder të flitet për Torvald Stoltenberg meqë veprat e tij janë gjithkund rreth qytetarëve të Shkupit. Ai tha se qytetarët e Shkupit e kujtojnë Torvald Stoltenberg për nga ndihma që ka dhënë në ditët e para menjëherë pas tërmetit, për shkak të cilës Shkupi fitoi Klinikën për Fëmijë, u koordinua aktiviteti i Kryqit të Kuq të Norvegjisë, për shkak të barakave të ndërtuara norvegjeze si dhe për shkak të ndihmës së koordinuar mes Mbretërisë së Norvegjisë dhe Mbretërisë së Suedisë.
“Stoltenberg për qytetin tonë bëri gjithçka që një njeri mund të bëjë për njerëzit tjerë. Shkupjanët nuk mund, nuk guxojnë dhe nuk do t’i harrojnë veprat e tij. Pikërisht për këtë shkak unë si kryetar i bashkisë fillova nismën që kjo rrugë e cila është hyrja në Parkun e Qytetit rreth stadiumit të qytetit dhe shpie deri në bregun e lumit Vardar, të emërohet si ‘Rruga e Stoltenbergut’”, tha Shilegov.
Sekretari i përgjithshëm i NATO-s, Jens Stoltenberg shprehu kënaqësinë të jetë i pranishëm në solemnitetin ku në Shkup emërohet një rrugë e cila do të bartë emrin e babait të tij. Ai rikujtoi se për herë të parë e vizitoi Shkupin në vitin 1960, kur babai i tij Torvald punoi në ambasadën e Norvegjisë në Beograd dhe ka pasur lidhje të veçantë me Shkupin, meqë ishte përgjegjës për koordinimin e ndihmës së Norvegjisë pas tërmetit.
Stoltenberg theksoi se i vjen mirë të shohë se Shkupi si qytet është zhvilluar në shumë sfera si dhe i pëlqen atmosfera në Shkup.
“Në zemrën e babait tim çdo herë kishte vend të posaçëm për Shkupin meqë ishte afër Shkupit pas tërmetit. E kishte nder që u emërua si qytetar nderi i Shkupit ndërsa tani do të ishte edhe më i nderuar nëse e di se një rrugë në Shkup është emëruar me emrin e tij”, theksoi Stoltenberg.
Torvald Stoltenberg, babai i Jens Stoltenberg, ishte një politikan norvegjez. Gjatë karrierës së tij politike ai ishte ministër i Mbrojtjes dhe dy herë ministër i Punëve të Jashtme i Norvegjisë.
/b.d
