Gjatë një fjale në parlament për të komentuar shkrimin në Zërin e Amerikës, atë ku aludohej se zgjedhjet e 2017-ës mund të ishin blerë, referuar përgjimeve të kryebashkiakut të Durrësit Vangjush Dako me Avdylajt e Shijakut, Luan Rama i LSI-së, dikur në PS, akuzoi ish-partinë e tij nën drejtimin e Edi Ramës se kishte prishur një traditë pozitive të PS-së së dikurshme, lidhur me standartin e zgjedhjeve.
Sipas Ramës, ajo që përflitej sot për PS-në dje nuk ekzistonte. Në fakt ka ekzistuar e madje Rama vetë (Luan) ka qenë një simbol i saj, pra i përfoljes për manipulim votash, ndonëse pa blerje.
Është fjala për zgjedhjet e përgjithshme të vitit 2001. Ai dhe Ilir Gjoni, njëri në Mat e tjetri në Dibër, do ishin dy emrat që PD do shënjestronte për abuzime me votën në zonat e tyre elektorale. Por më së shumti Luan Rama, i cili ishte atë kohë dhe një ndër figurat kryesore në PS. Anëtar Kryesie, zëdhënës i PS-së, e po ashtu ministër Rendi, ishin postet larta që mbajti atë kohë.
Zgjedhjet e 2001-it, ku PS morri një mandat të dytë, ishin ndër më të kontestuarat e viteve 2000, ku disa mandate shkuan në Gjykatë Kushtetuese, e me verdikt të kësaj të fundit iu dhanë shumë emrave të së majtës.
Por jo të gjitha zgjedhjet në epokën pluraliste kanë qenë të kontestuara. Ka patur prej tyre që janë shqëruar me ndonjë parregullsi teknike, por pa u kontestuar në rezultatin final.
Dhe ja një pasqyrë e tyre:
-Zgjedhjet historike të marsit ’92, kalimi i pushtetit nga PS te PD: asnjë kontestim.
-Zgjedhjet lokale tre muaj më vonë, në maj ‘92: fiton PS, asnjë kontestim nga humbësi PD.
-Zgjedhjet e referendumit të Kushtetutës së re, nëntor ’94: humbet Berisha (mbrojtës i draftit) asnjë kontestim.
-Zgjedhjet parlamentare të majit ‘96: historike sa i përket kontestimit. PS i bojkotin nën akuza të forta për manipulime e vjedhje vote, i konteston fuqishëm dhe faktori ndërkombëtar.
-Zgjedhjet lokale 5 muaj më vonë, tetor ’96: fiton PD, asnjë kontestim.
-Zgjedhjet e parakohshme parlamentare në qershor ’97: fiton e majta si koalicion: asnjë kontestim teknik, Berisha i deligjitimon politikisht me epitetin “parlamenti i kallashit”.
-Zgjedhjet lokale të vitit 2000: fiton PS, asnjë kontestim nga humbësi.
-Zgjedhjet parlamentare një vit më vonë: fiton PS nën kontestimet e forta të PD-së për manipulim, Luan Rama në qendër të akuzave për “policë me duar në kuti”.
-Zgjedhjet lokale të vitit 2003: Fiton PS, PD (me kandidatin Spartak Ngjela përballë Ramës në Tiranë), konteston rezultatin e kryeqytetit.
-Zgjedhjet parlamentare të 2005-ës: fiton PD, asnjë kontestim nga PS.
-Zgjedhjet lokale të 2007-ës, kulmi i pushtetit të PD-së: fiton PS (Rama mund bindshëm në Tiranë të ndjerin Olldashi), asnjë kontestim nga humbësi.
-Zgjedhjet parlamentare 2009: barazim në mandate PS – PD, pushteti u mbetet demokratëve nga katër mandatet e LSI-së, PS konteston fort rezultatin, deri dhe me grevë urie.
-Zgjedhjet lokale 2011: PS fiton bindshëm, asnjë kontestim nga PD, por drama luhet në Tiranë. PD i rrëmben fitoren Ramës përballë Bashës në KQZ.
-Zgjedhjet parlamentare 2013: fiton bindshëm PS-LSI, asnjë kontestim nga PD ditët e para dhe Berisha dorëhiqet pa vënë fare në dyshim rezultatin. Kontestimet nisin dy javë më vonë me tezën e “votave të blera nga krimi” në zonën e Kurbinit.
-Zgjedhjet lokale 2015: fiton bindshëm PS-LSI, PD nuk konteston rezutatin, por standartet. Teza: “fitoi krimi i kandiduar” (Roshi, Bushi).
-Zgjedhje parlamentare të 2017-ës: fiton bindshëm PS, kontestime nga PD pak ditë pas rezultatit me tezën e “votave të blera”. (tesheshi)
/a.meta
