Vendimi për të lënë pushim një nga prindërit e fëmijëve të arsimit parashkollor dhe fillor, u mor për të ndihmuar në kujdesin e tyre.
Ministrja për Inovacionin dhe Administratën Publike, Milena Harito sqaron se prindi duhet të paraqesë vetëdeklarimin tek punëdhënësi.
Në një prononcim për mediat vizive, Harito tha se “është një gjë e mirë që të ndihmohen prindërit që kanë fëmijë të vegjël. Secili nga prindërit do të rrijë, kjo është një gjë që zgjidhet lehtësisht sepse me një vetëdeklarim, pra prindërit do të sjellin pranë punëdhënësit të tyre një certifikatë familjare dhe një vetëdeklarim ku thonë se cili nga prindërit do të rrijë të mbajë fëmijët. Nëse të dy prindërit e bëjnë këtë gjë dhe janë në administratë, ata bëjnë një falsifikim dhe marrin përgjegjësinë për falsifikimin që bëjnë”.
Ministrja Harito tha se në bazë të të dhënave të Ministrisë së Shëndetësisë, ku paraqiten rreth 16 mijë raste pacientësh me grip në javë, vendimi për mbylljen e shkollave bëhet për të parandaluar përhapjen më të shpejtë të gripit.
