Një ndërtesë me 300 dhoma me rreth 90 mijë metra katrorë, e kompletuar me një pishinë, park dhe plazh me dalje private në det, është vila 60 milionë euroshe super luksoze që presidenti turk Rexhep Tajip Erdogan kishte ndërtuar për pushimet verore në Marmaris, një nga vendpushimet më ekskluzive në bregdetin jugor të Egjeut të Turqisë.
Një pallat, i cili po ngjall kritika të forta në opinionin publik. Pamjet e “Pallatit të Verës”, siç u riemërua duke evokuar të ashtuquajturin “Pallati i Bardhë” që kreu i shtetit kishte ndërtuar në kryeqytetin Ankara, u shpërndanë nga gazeta laike e opozitës Sozcu.
Në pamjet e marra nga ajri të vendbanimit, të përfunduara në 2019, shihet edhe një pistë helikopterësh.
Vala e indinjatës ishte shumë e fortë, për arsye të ndryshme, së pari për koston e tepërt në një periudhë të vështirësisë ekonomike dhe zhvlerësimin e lirës turke për shkak të pandemisë, por edhe për shpyllëzimet masive të zonës së nevojshme për zgjerimin e ndërtesës, në vendin ku tashmë ishte vendosur rezidenca verore e ishpresidentit Turgut Özal.
Erdogan ndërkohë ka qenë nën kritika të forta dhe për pallatin ku jeton, ndërtimi i të cilit ka kushtuar 500 mln euro. Rezidenca super luksoze, e ndërtuar me paratë e shtetasve turq, ka 1100 dhoma dhe ndodhet në periferi të Ankarasë, majë një kodre.
Pallati është super luksoz, si i çdo despoti, me dysheme mermeri, pajisje ari e qilime të kuq. Ndërtesa super luksoze e Erdogan është 30 herë më e madhe se Shtëpia e Bardhë. 7 milionë sterlina janë shpenzuar vetëm për tapetet. 5 milionë sterlina janë shpenzuar për 400 dyert e pallatit. Çdo gotë në pallat ka kushtuar 250 sterlina.
Në pallat ka spa, pishina, banjo turke, sauna dhe vetëm fatura e ngrohjes shkon 500 mijë sterlina çdo vit. Gjykata vendosi në vitin 2015 se pallati është një ndërtim i paligjshëm, por Erdogan vazhdoi projektin
/b.h
