Dy persona, një i dënuar për trafik droge me 4.8 vite burg nga Saranda dhe një i shoqëruar nga Lushnja për vjedhjen e disa kg ullinj kanë ndërruar jetë dje në QSUT si pasojë e problemeve me zemrën.
Viktimat janë Adem Alushi 60-vjeç nga Saranda dhe Fadil Hoxha 54-vjeç nga fshati Grabian, Lushnje. 54-vjeçari Fadil Hoxha ishte shoqëruar dje nga policia në Lushnje pas denoncimit nga pronari i një toke se kishte vjedhur disa kg ullinj.
Pas komplikacioneve, tension të lartë dhe disa shtrëngimeve në kraharor, 54-vjeçari sipas policisë është dërguar nga ambientet e paraburgimit në spitalin e Lushnjes.
Duke parë që gjendja e Hoxhës ka qenë e ndërlikuar dhe po agravohej, ai është nisur për në Tiranë për mjekim më të specializuar, pasi kishte kaluar një para infarkt.
Sipas QSUT, Fadil Hoxha pas mbërritjes në spital është futur në sallën e operacionit, por nuk ka mundur të mbijetojë, pasi dy arteret kryesore që furnizojnë zemrën me gjak i kishte të bllokuara.
Familjarët fajësojnë policinë për vdekjen, pasi sipas tyre Hoxha ishte i sëmurë nga zemra dhe tensioni dhe merrte tre herë në ditë ilaçe.
Sipas tyre në momentin e shoqërimit nuk janë lejuar që t’ia japin në ambientet e paraburgimit ilaçet, ndërsa akuzojnë policinë se i ka bërë presion që të pranonte akuzat dhe e ka keqtrajtuar.
“E ka marrë policia e Divjakës dhe e ka futur në rajon. Familjarët shkuan dhe i kërkuan policisë mos i bëni presion se do u ngelet në dorë.
Por ne dyshojmë nëse policia ia kanë dhënë ilaçet. Nga Divjaka e dërguan në Lushnje, sot është ndjerë keq dhe në orën 14:00 e kanë sjellë në Tiranë.
Ne akuzojmë policinë, pasi viktima ishte invalid dhe me kemp dhe nuk e dimë nëse i ka marrë ilaçet. Ku janë provat dhe çfarë ka bërë. U fut në spital dhe nuk doli që ta shihnim.
Duam të dimë shkakun, autopsinë, për çfarë vdiq? Mjeku që bëri autopsinë nuk erdhi këtu. Dyshojmë se policia e ka keqtrajtuar, kërkojmë të zbardhet ngjarja dhe e vërteta. Ai është keqtrajtuar me kërcënime, që të pranonte akuzat”shprehen familjarët e Fadil Hoxhës.
Por policia e Lushnjes mohon akuzat e familjarëve dhe sipas tyre, Fadil Hoxha i ka marrë ilaçet gjatë kohës që ka qenë i shoqëruar në ambientet e paraburgimit.
“Më datën 18.09.2016, rreth orës 11:30, shtetasi Fadil Hoxha ka patur dhimbje të forta në gjoks dhe menjëherē është njoftuar dhe ka ardhur ekipi mjekësor i urgjencës së Spitalit Lushnjë ku pas vizitës ai është shoqëruar për në spital ku është ekzaminuar nga mjeku kardiolog.
Nga mjekët e spitalit Lushnje është konstatuar se ky shtetas kishte probleme të rënda kardiake dhe është nisur me urgjencë për në spitalin “Nënë Tereza” Tiranë.
Fadil Hoxha ka deklaruar se vuan nga tensioni dhe ka pasur me vete ilaçe të cilat i ka marrë rregullisht.
Gjithashtu sot rreth orës 08.20 minuta familjarët janë njoftuar nga përgjegjësi i dhomave të paraburgimit qè ti sillnin edhe një ilaç tjetër që i kishte kërkuar në orën 08.15.
Rreth orës 10.15 minuta familjarët kanë sjellë edhe ilaçin tjetër të cilin e ka konsumuar në rregull.
Theksojmë se mjeku i Drejtorisë Vendore të Policisë Fier ka asistuar rastin nga momenti i shoqërimit në dhomat e paraburgimit e deri në QSUT.
Familjarët e personit të arrestuar nuk kanë pasur asnjë ankesë për trajtimin e problemit të tij shëndetësor deri ne momentin e përkeqësimit të shëndetit të tij, kur Policia ka bërë menjëherë shoqërimin për në Spitalin e Lushnjës” deklaron policia.
Për shkaqet e vdekjes kanë nisur hetimet, ndërsa pritet autopsia mjeko-ligjore. Ndërsa viktima e dytë është Adem Alushi 60-vjeç banues në lagjen nr. 2 Sarandë, i dënuar me 4.8 vite burg për trafik droge.
60- vjeçari nga Saranda ka ndërruar jetë po gjatë ditës së sotme në reanimacionin e kardiologjisë në QSUT. Pas problemeve me zemrën, Adem Alushi ishte transportuar në datë 11 shtator nga burgu i Fierit ku po vuante dënimin për në Tiranë, ku i ishte nënshtruar një ndërhyrje, por nuk arriti që të mbijetonte duke ndërruar jetë.
Adem Alushi akuzohet për trafik droge, pasi iu sekuestruan në 27 Nëntor 2015, 36,5 kilogramë hashash në pikën e kalimit kufitar të Qafë-Botës.
Adem Alushi u dënua me 7.8 vite burg për veprën penale të trafikut të drogës, por duke qenë e pranoi gjykimin e shkurtuar përfitoi ulje me 1/3 duke zbritur dënimin 4.8 vite.
shqiptarja.com/d.i.
