Ekzaktësisht përpara 1 muaji, në 19 korrik, Spanja u shpall kampione e botës për herë të dytë në historinë e saj në futboll.
Nën drejtimin e Luis De La Fuente, La Roja iu imponua me autoritet në finale Argjentinës duke e mundur 1-0 në kohën shtesë ( 120 minuta).
Disa orë pas finales, lindën teoritë konspirative rreth kësaj finaleje duke lënë të nënkuptohet ndër të tjerat se futbollistët e skuadrës Albiceleste e dorëzuan finalen. Tani një muaj më vonë, presidenti i Federatës Argjentinase të Futbollit, Claudio Tapia doli me një komunikatë në rrjetet sociale duke dënuar me forcë këto teori.
‘Një muaj me gënjeshtra dhe një fushatë e mjerueshme për të krijuar idenë se kjo Kombëtare ishte dorëzuar-shkruan Claudio Tapia në komunikatën e tij-nuk duhet që të lejohet të gënjehet, të sajohet një histori, të ushqehen dyshimet prej ditësh dhe kur koha tregon se gjithçka ishte tym, të fshihet dhe të bësh sikur nuk ka ndodhur asgjë’.
Komunikata e kreut të Federatës Argjentinase të futbollit ishte shumë e ashpër edhe në vijim të saj.
‘Ndërsa futbollistët tanë dhanë gjithçka në fushën e lojës, kishte nga ata që jashtë saj shpërndanin urrejtje, kërkonin të shkatërronin imazhin e një kombëtareje që fitoi respektin e miliona njerëzve. Nuk do të mund ta fshijnë atë që bënë, nga trajtimi si tradhtarë të futbollistëve të kombëtares, nuk ka kthim pas’, shton Tapia, që nuk e la me kaq teksa kërkoi me forcë që të kërkohet ndjesë ndaj skuadrës Albiceleste.
‘Kur akuzohen, gënjehet dhe lëndohen publikisht ata që dhanë gjithçka për këtë fanellë, të kërkosh falje nuk është një favor. Është një detyrim, ata që dhanë shpirtin nuk kanë pse të japin shpjegime, ata që gënjyen po’, thekson ai.
