Një studim i publikuar në revistën shkencore “Nature Neuroscience” nga Yves De Koninck dhe Robert Bonin, dy hulumtuesit në Université Laval, tregon se është e mundur të lehtësohet hiperndjeshmëria e dhimbjes duke e përdorur një metodë të re që përfshin rindezjen e dhimbjes në mënyrë që ajo më pas të mund të fshihet. Ky zbulim mund të çojë në metoda të reja për ta lehtësuar dhimbjen kronike. Hulumtuesit nga Fakulteti i Mjekësisë në Université Laval dhe Institut Universitaire en Santé Mentale de Québec (IUSMQ) u frymëzuan nga puna e mëparshme në kujtesë, e kryer rreth pesëmbëdhjetë vjet më parë. Këto studime zbuluan se kur memoria riaktivizohet gjatë kujtesës, kodimi i saj neurokimik hapet përkohësisht. Administrimi simultan i një ilaçi që e bllokon rikonsolidimin neurokemikal të memories, rezulton në fshirjen e saj.
Hulumtuesit donin ta shihnin nëse po bëhej fjalë për ndonjë mekanizëm të ngjashëm gjatë kodimit neurokimik të sensibilizimit të dhimbjes. Për këtë qëllim, ata injektuan kapsaicinë në këmbët e minjve. Kapsaicina, kimikati djegës në specat djegës, shkakton një ndjesi djegieje. Procedura, e cila nuk shkakton asnjë dëm fizik, shkakton hiperndjeshmëri të dhimbjes përmes një procesi të sintezës së proteinave në palcën kurrizore. Pas injektimeve me kapsaicinë, presioni mekanik me të cilin minjtë do të dridheshin ishte rreth një e treta e presionit në situata normale.
Tre orë më vonë, studiuesit administruan një dozë të dytë të kapsaicinës dhe, në të njëjtën kohë, një medikament që e bllokon sintezën e proteinës. Hiperndjeshmëria pastaj u zhduk me shpejtësi. Brenda më pak se 2 orëve, presioni i toleruar nga minjtë ishte kthyer në 70% të normales.
Yves De Koninck shpjegon se “kur administrohet vetëm frenuesi i sintezës së proteinës, hiperndjeshmëria mbetet. Injektimi i dytë i kapsaicinës është i nevojshëm për ta shndërruar ndjeshmërinë në dhimbje të paqëndrueshme dhe për të qenë në gjendje të ndërhyhet në rikonsolidimin e saj neurokimik. Sfida tani do të jetë t’i gjejmë frenuesit e sintezës së proteinave që janë jotoksike dhe shkaktojnë efekte minimale anësore në njerëz”.
Yves De Koninck është profesor i psikiatrisë dhe neuroshkencës në Université Laval dhe drejtor shkencor i Institut Universitaire en Santé mentale de Québec.
Robert Bonin është hulumtues post-akademik në laboratorin e prof. De Koninck, ku punon në mekanizmat prapa etiologjisë së dhimbjes kronike. Puna u mbështet financiarisht nga Institutet kanadeze të Kërkimeve Shëndetësore dhe Fonds de la Recherche en sante du Québec, përgatiti Koha.
