Deputeti i Partisë Demokratike, Agron Gjekmarkaj, është shprehur se duhet një Kongres për rithemelimin e Partisë Demokratike, për ta kthyer atë në një alternativë qeverisëse, por jo si Kongresi i Rithemelimit të Berishës, pasi sipas tij, ai ishte i njëanshëm.
Komentet Gjekmarkaj i bëri gjatë një interviste në Panorama TV, ku tha se gjatë këtyre dy viteve të fundit është parë një peshë e madhe në elektorat e ish-kryeministrit Sali Berisha.
Ai tha se në riorganizimin e PD-së, Berisha duhet të jetë pjesë e zgjidhjes së problemit, por shtoi se ai nuk mund të jetë një alternativë fituese përballë qeverisë së kryeministrit Edi Rama.
“Këto 2 vite u pa një peshë e fortë e Berishës në elektorat pasi grumbulloi rreth 500 mijë vota. Duhet të jetë pjesë e zgjidhjes. Por për mendimin tim Berisha nuk mund të jetë alternativë fituese. Nëse ai ka qëllim që të jetë i dyti, e ka arritur këtë qëllim.
Nuk kam dëshirë të flas për një grup kur nuk jam pjesë, nëse ndodh që të jem pjesë, do të flas, ndryshe do të qëndroj larg secilës palë. Do të doja që kushdo që nëse do të zgjidhej të ishte dikush që të kishte qëllim bashkimin e PD. Duhet çuar partia drejt një kongresi rithemelimi të PD-së. Mjafton të bashkohen vullnetet pozitive dhe kjo ndodhë. Nëse ndodh, PD do të kthehet në një forcë alternative.
Bashkimi është kusht i domosdoshëm, por jo i mjaftueshëm. Nëse nuk ndryshon shkolla politike, nëse nuk modernizohet dhe të ndjekim kërkesat e shoqërisë, jemi të destinuar të dështojmë. Nëse nuk lusim elitat që t’i bashkohen kësaj partie, nuk favorizohemi për të ardhur në pushtet. Përkundrazi vetëm do të përfundojmë në fyerje dhe sharje si skenat e ditës së djeshme që unë dua të distancohem prej tyre.
Unë kam qenë nënkryetar i PD-së dhe kam dhënë dorëheqjen nga ato funksione. Zonja Açka ka qenë atje, nuk e di si është organizuar mbledhja dje. Atje kishte edhe deputetë, edhe njerëz të panjohur edhe njerëz që mund të jenë në kërkim nga policia jshtë dritareve që ju bënin karshillëk deputetëve dhe njerëzve që kanë qenë brenda”, u shpreh Gjekmarkaj./m.j
