Kryeministri Edi Rama bëri një ftesë publike për shqiptarët e suksesshëm që kërkojnë të kontribuojnë për vendin. Por kjo thirrje u keqkuptua dhe në adresën e lançuar “shqiperiaqeduam@kryeministria.al” kanë vërshuar kërkesa për punë.
Kreu i qeverisë shqiptare e ka nisur një reagim të sotëm me një falenderim për 800 të interesuarit e parë vetëm në 24 orë, por ai thotë se ndjen nevojën për të bërë edhe një sqarim. Sipas Ramës ftesa që ai i ka bërë shqiptarëve, ishte për të gjetur persona të suksesshëm brenda dhe jashtë vendin që mund të japin kontributin dhe idetë e tyre në fusha specifike, për të përmirësuar kështu katër vitet e ardhme të qeverisjes, në rrugën që Rama e quan, Shqipëria që duam.
Për rastet e kërkesave për punë, shefi i mazhorancës sqaron se ato trajtohen nga institucionet përkatëse.
/a.m.
