Teksa vuante dënimin në një qeli në Francë, 36-vjeçari shqiptar humbi jetën. Ai është identifikuar si Mentor Rexha, për të cilin autoritetet franceze thanë se ndërroi jetë më 1 shkurt duke u vetëvrarë.
Por familjarët kanë dyshime se është torturuar duke u bazuar tek shenjat e dhunës në trup dhe fytyrë.
Familjarët thonë se janë njoftuar me vonesë për lajmin tragjik, dhe jo nga burime zyrtare, ndërsa vetëm ditën e djeshme janë lejuar të shohin trupin e pajetë në morg, ku kanë konfirmuar se është i afërmi i tyre, shkruan Shqiptarja.
Njoftimin e morën nga shokë që ishin në një burg me të, duke mësuar se u gjet i vdekur në mbrëmjen e 1 shkurtit në dhomën e izolimit.
Motra dhe vëllai u nisën drejt Francës dhe janë tmerruar nga pamja e të ndjerit.
Ata nuk e besojnë faktin që është vetëvrarë ndaj i kanë bërë foto duke thënë se ka shenja në kraharor, një shenjë litari në fyt, por edhe një të çarë në kokë. Përmes një avokati, ata po përpiqen të marrin autopsinë për të zbuluar se çfarë ndodhi me vëllain e tyre.
“Këto shenja tregojnë se atë e kanë masakruar dhe e kanë mbytur në burgun e Francës. Familjarët kanë kërkuar edhe një herë t’i bëhet ekspertiza por shteti ka thënë jo, se është vetëvrasje. Kjo nuk është një vetëvrasje pasi ato shenja një njeri nuk mund t’ia bëje vetvetes , ajo duket më së miri se atë e kanë mbytur. Dhe këtu lind dhe dyshimi sepse ata nuk kanë lejuar ta shohin, sepse në fakt ekspertiza apo fjalët që kanë thënë ata kanë qenë të gabuara”, thonë familjarët.
Mentor Rexha ka lindur në Lezhë dhe banonte në Shkodër, por një vit më parë shkoi në Francë si emigrant për të pasur një mundësi më të mirë ekonomike. Në Francë, Rexha ka aplikuar për procedurat e marrjes së statusit të azilantit. Por autoritetet franceze e kanë arrestuar dhe e kanë lënë të vuajë dënimin në burgun e Lorentit pasi u përfshi në një ngjarje kriminale.
Sipas familjarëve, bëhej fjalë për djegien e disa automjeteve, por ai i thoshte se ishte i pafajshëm.
Trupi i pajetë i shqiptarit akoma nuk është sjellë në Shqipëri, ndërsa familjarët bëjnë apel që shteti të ndërhyjë dhe t’i ndihmojë me procedurat por edhe me zbardhjen e të vërtetës për ndarjen nga jeta të Mentor Rexhës.
/a.r
