Një gojë e mbyllur e shoqëruar nga flamuri shqiptar dhe një gojë e hapur, e shoqëruar nga flamuri zviceran. Është fotoja që po përhapet me shpejtësi të madhe në portalet shqiptare pohon “20 minuten” dhe po shpërndahet me qindra herë në rrjetet sociale. Mendohet që fotoja rrjedh nga një zyrë zvicerane.
Pllakati iu sugjeron punëtorëve që të mos flasin shqip, por të komunikojnë në një gjuhë të Zvicrës. Nuk dihet saktësisht se ku është fiksuar kjo pamje dhe a është e vërtetë. Ajo është postuar nga një punonjës shqiptar. Megjithatë, gjakrat janë nxehur.
Komentatorë të shumtë shqiptarë janë të irrituar me faktin që dikujt në Zvicër i pengoka që shqiptarët të flasin në gjuhën e nënës, transmeton media. Media, me një shënim në fund të artikullit, i lut të informuarit për vendin e pllakatit që të paraqiten në redaksi, duke lënë edhe të dhënat e kontaktit të tyre.
