Dy liderët e koalicionit qeverisës, kryeministri Edi Rama dhe kryeparlamentari Ilir Meta po mbajnë një takim kokë më kokë midis tyre, kësaj here në ambientet e Kryeministrisë, një pikë takimi kjo e pazakontë mes dy liderëve politikë të qeverisjes.
Por burime të Javanews pranë kryetarit të kuvendit dhe kryeministrit bëjnë me dije se takimi mes krerëve të shtetit ka qenë i planifikuar prej javësh dhe nuk ka të bëjë me axhendën e parlamentit të ditës së enjte.
Ditën e nesërme mbahet seanca plenare teksa në fokus të diskutimeve do të jenë dy ligje mjaft të debatuara. Të enjten janë në rend dite dy projektligje , ai për “sigurinë publike” apo për kamerat e sigurisë siç njihet rëndom si dhe projektligji për “importin e mbetjeve”. Për këtë të fundit LSI ka paraqitur edhe një amendament.
Ndërkohë, më herët janë zhvilluar negociata mes përfaqësuesve të PS-LSI edhe për disa ndryshime në prjektligjin e sigurisë publike./a.m.
