Nga Artan Hoxha
Ishte koha kur mafia i vriste komisarët e policisë! Çdo 7 gusht është gjithnjë një ditë e trishtuar për mua. Është një datë që më kujton vazhdimisht BURRAT, ata BURRA të vërtetë, që sakrifikuan edhe jetën, për këtë vend.
Dhe nuk janë dëshmorë të shekullit të kaluar! Janë heronjtë tanë, ku dëshmitarë të humbjes së jetëve të tyre heroike, jemi vetë. Me 7 gusht 2003, nderroi jete duke luftuar me vdekjen, “Dëshmori i Atdheut”, Kolonel Gani Malushi.
I plagosur një ditë më parë në një atentat tipik mafioz, të organizuar vetëm 100 metra pranë drejtorisë së policisë Durrës, Shefi i komisariatit të Krujës, kolonjari 50-vjeçar Gani Malushi, nuk i mbijetoi breshërisë së kallashnikovit…
Më 7 gusht 2009, po në qytetin e Durrësit, në një operacion policor të skuadrës së operacioneve speciale, për të arrestuar Dritan Dajtin, mbetën të vrarë 4 oficerë policie, Fatos Xhani, Altin Dizdari, Kastriot Feskaj, dhe Sajmir Duçkollari, tashmë “Dëshmorë të Atdheut”. Nderim dhe krenari për ju, “Deshmore te Atdheut”. Sakrifica juaj, hijeshon Varrezat e “Dëshmorëve të Kombit”.
