Një Asamble Parlamentare e NATO-s në Kosovë
Për herë të parë Kosova do të mirëpresë një Asamble Parlamentare të NATO-s. Lajmin e bën të ditur ish-kryeministri shqiptar Pandeli Majko përmes një statusi në “Facebook”.
“Asambleja Parlamentare e NATO-s për herë të parë ka futur në kalendarin e veprimtarive të veta Kosovën si vend pritës. Në Prishtinë (në nëntor 2016) do të mbahet Seminari Rose-Routh me pjesëmarrjen e përfaqësuesve nga të gjitha vendet anëtare të NATO-s”, shkruan deputeti socialist.
“Kjo u vendos dje në mbledhjen e drejtuesve të delegacioneve të Asamblesë Parlamentare në Stavanger të Norvegjisë, ku mbahet sesioni i radhës. Ne maj të vitit tjetër ky sesion (me rreth 700 pjesëmarrës) do të mbahet në Tiranë”, informon Majko më tej.
Këtë lajm e përshëndeti edhe zëvendëskryetari i Kuvendit të Kosovës, Xhavit Haliti. Po në “Facebook” ai shprehet se një takim i këtyre përmasave është në interes të Kosovës, shpreh besimin që NATO-ja ka te qytetarët e Kosovës, institucionet e saj si dhe te popujt e qeveritë e rajonit, për vazhdimin e politikave të çtensionimit dhe përmirësimin e raporteve ndërmjet popujve të rajonit.
“Është përgjegjësi e institucioneve dhe popullit të Kosovës që të vazhdojmë përpjekjet e përbashkëta me Perëndimin për të luftuar terrorizmin, krimin e organizuar, korrupsionin dhe për të shtuar masat e sigurisë për Kosovën dhe Rajonin.
Evropianizimi i Ballkanit është kontribut për sigurinë e kontinentit tonë, paqen dhe sigurinë e vendeve të cilat janë të bashkuara për bashkëveprim për liritë e të gjithë njerëzimit”, shkruan Haliti.
