Skënder Minxhozi/
Një banor i Lezhës shprehej sot në një bisedë të lirshme, se një nga arsyet e humbjes së kandidatit të të majtës në zgjedhje Viktor Tusha, mund të ketë qenë edhe fakti se katër vjet më parë, në zgjedhjet lokale të vitit 2011, PS u angazhua me të gjitha forcat që Tusha të mos fitojë në zgjedhje, përballë kandidatit të saj Gjok Jaku. Ishte koha kur LSI ndodhej në koalicion qeverisës me PD. Një kohë që sot duket vite dritë larg, pas fitores së vitit 2013.
Kishte shumë entusiazëm në fushatën e së majtës në këto zgjedhje. Një rrethanë që mund të ketë bërë që të maskohet tinëz, nevoja që PS dhe LSI kanë, për t’u integruar edhe në nivel lokal mes tyre. Marrëveshja e fundit për ndarjen e kandidaturave nuk nxorri në dukje asnjë problem mes Ramës dhe Metës. Të paktën jo publikisht. Por ndoshta mund të mos ketë qenë vetëm aty problemi i ndarjes së tortës së pushtetit vendor dhe i fitores së 21 qershorit. Rezultatet jo të mira që po shfaqen në bashkitë ku kandidojnë figurat të sponsorizuara politikisht nga LSI, në Lezhë, Pogradec e Vorë, dëshmojnë jo vetëm defektet e veçanta dhe gabimet elektorale që mund të ketë bërë secili kandidat, por edhe një dukuri tjetër më të gjerë. E cila ka të bëjë ndoshta me atë idenë e qytetarit lezhjan.
Sot e majta ka, mesa po na thotë vota e 21 qershorit, një aleancë e cila funksionon mirë dhe pa probleme në katet e larta të qeverisjes qëndrore, në bashkëpunimin parlamentar dhe ekzekutiv, por ndoshta jo ashtu si duhet, në nivelin e bazës së majtë, në terren. Me shumë gjasë socialistët e Lezhës dhe Shëngjinit nuk e kanë harruar ende si të tillë, rivalin e para katër viteve Viktor Tusha dhe kjo mund të ketë sjellë një zbaticë votash në favorin e tij ditën e diel.
Megjithatë, kjo analizë qëndron e paplotë, pa u shqyrtuar me kujdes edhe vota popullore, ajo që hidhet për këshillat bashkiake dhe që mban siglat e partive. Sipas informacioneve të fundit, LSI ka marrë një numër të lartë votash popullore në disa qarqe kryesore, çka bën që humbja e mandateve të kryebashkiakëve të mos ngjajë si një disfatë elektorale. Por si një sinjal serioz që duhet analizuar me logjikë të ftohtë në javët që vijnë.
