Kryetari i partisë Demokratike doli sot në një bashkëbisedim me ndjekësit e tij në rrjetet sociale, ku iu përgjigj pyetjeve dhe bëri komente për situatën politike dhe të aktualitetit në Shqipëri, nga situata e rendit, deri tek ajo e zjarreve.
Ai akuzoi qeverinë për nivelin e krimit në vend, përfshi ngjarjen e fundit në Ksamil ku u vra turisti portugez, por edhe për zjarret në Shqipëri, pasi pas tyre dyshohet se qëndron projekti për “Paketën e Maleve”.
Duke u përgjigjur ai nënvizoi se “ku ka zë, nuk është pa gjë”.
“Fatkeqësisht Shqipëria dominohet nga krimi. Kjo është organizatë kriminale dhe jo qeveri. Aty ku ka zë nuk është pa gjë thotë populli”, deklaroi ai.
Kurse për ambasadorin e ri të SHBA-ve, Berisha tha se kishte mendim pozitiv, kurse për vizitën e pritshme të tij në SHBA, shpjegoi se do ndodhte me rastin e ndonjë konference ndërkombëtare.
“Kam mendim shumë pozitiv për ambasadorin e SHBA nga ajo që kam dëgjuar, është njeri me eksperiencë të gjerë. Kurse për vizitën time në SHBA, siç kam thënë edhe më parë, do të shkojë në SHBA me rastin e ndonjë konference dhe kjo do ndodhë”, u përgjigj ai ndaj pyetjeve të ndjekësve.
Por fokusi i tij kryesor u përqendrua te pyetja për Shtetin Bektashi. Berisha u shpreh kundër dhe akuzoi kryeministrin Edi Rama.
“PD ka reaguar fuqimisht. Kam qenë në arrest shtëpie kur kam reaguar fuqimisht për këtë çështje, që nga janari 2024, e të njëjtin reagim të fortë PD ka bërë edhe më 2025. Në bindjen tim të thellë ky është një akt në radhë të parë kundër Bektashizmit shqiptar, që ka qenë dhe është shtyllë e vërtetë e atdhetarisë. Ata ishin themeluesit e doktrinës së shqiptarisë, ishin rezistentët e pamposhtur ndaj ndryshimeve të diktaturës. Dhanë gjakun e tyre dhe kontributin e tyre për shtet sovran. Kanë frymëzuar integritetin kombëtar”, tha ai.
Dhe më tej shprehu dyshimet për këtë nismë:
“Kjo është në kundërshtim të hapur me Kushtetutën e Shqipërisë dhe me natyrën laike të shtetit shqiptar që nga themelimi e sot, përpiqet të nxisë përçarje fetare në vend, ku tolerance fetare është gjëja më madhështore e këtij populli. Kërkon që të njohë edhe monedhën BEK që Rama të lajë miliardat e tij, në atë të ashtuquajtur Vatikani i dytë. Rama kërkon një shtet personal për paratë dhe pasaportat diplomatike, PD ka qenë dhe është kundër kësaj nisme antikushtetuese, antikombëtare dhe antishqiptare”.
