Deputeti i Partisë Socialiste, Petro Koçi thotë se ish kryeministri Sali Berisha nuk e di gjininë e tij politike, duke ironizuar propozimin e kryedemokratit, për njohjen me ligj të dy gjinive në vend.
Në një intervistë për “Newsline” në ABC News, Koçi u shpreh se Berisha, nëse do ishte politikan i ndershëm, nuk do ndodhin vrasjet në bulevard, në 21 Janar të vitit 2011.
“Në Shqipëri, populli ka një fjalë, hajduti të vret. Berisha, po të ishte politikan i ndershëm, nuk do vriste njeri në 21 janar. Vullneti i këtij njeriu, është vullnet kriminal.
Vjedhjen nuk e ka për gjë, por justifikon edhe veprime me humbje njerëzore. Është një lloj pelivani në politikë. Vet Berisha nuk e ka të qartë çfarë gjinie është në politikë, burrë apo grua.
Kjo është një politikë majmunësh, mungesë dinjiteti me thënë të drejtën.
Nëse ke mbajtur qëndrim të caktuar, më mirë hesht dhe ruaj dinjitetin. Unë mendoj se është një pozicion edhe qesharak.
Problemi i Partisë Demokratike është se nuk janë pasagjerët në tren, por makinisti. Ia kanë lënë trenin një njeriu që nuk e di se ku shkon. Kjo është Partia Demokratike sot”, theksoi ai.
