Në një klimë të tensionuar politike, në Maqedoni po zhvillohen zgjedhjet parlamentare.
Nga ora 07:00 deri në 19:00 të gjithë qytetarët maqedonas, shqiptarë dhe të pakicave të tjera votojnë për zgjedhjet e parakohshme parlamentare.
Zgjedhjet e jashtëzakonshme parlamentare në Maqedoni kanë nisur dje me votimin e diasporës, personave me nevoja të veçanta, të sëmurëve dhe atyre që janë duke vuajtur dënimin me burgim.
Në Listën zgjedhore për zgjedhjet e parakohshme parlamentare të 11 dhjetorit të regjistruar për votim janë 1.784.416 shtetas për të zgjedhur 120 deputetë, ndërsa në garë janë 11 lista të partive politike.
Zgjedhjet do të zhvillohen sipas modelit proporcional në gjashtë njësi zgjedhore. Në çdo njësi do të zgjidhen nga 20 deputetë.
Ndërkohë në Maqedoni shqiptarët, këto zgjedhje i presin të ndarë dhe me 5 lista zgjedhore, pavarësisht se mund të humbasin deputetë.
Fillimisht zgjedhjet e parakohshme u planifikuan për në muajin prill, por u shtynë dy herë mes ankesave të opozitës.
Nacionalisti Nikola Gruevski i VMRO-DPMNE, i cili dha dorëheqjen në muajin janar, kërkon të rimarrë postin që ka mbajtur prej 2006-s.
Ndërsa Zoran Zaev i LSDM, akuzon Gruevskin për korrupsion dhe abuzim në pushtet si dhe përgjime të paligjshme.
Zgjedhjet do të mbikëqyren nga rreth 5 mijë vëzhgues vendorë dhe ndërkombëtarë.
shqiptarja.com/d.i.
