Kanë nisur regjistrimet për raundin e parë në programet e studimit të Universitetit “Fan S. Noli” në Korçë, me interes të lartë nga maturantët fitues që në orët e para të mëngjesit.
Procesi do të vijojë deri më 8 shtator dhe do të zhvillohet në shtatë faza 48-orëshe.
“Kemi pasur një fluks maturantësh, të cilët janë paraqitur për të realizuar procesin e regjistrimit. Për shkak të një interesimi pak më të madh se programet e tjera, do mund të veçoja programin bachelor Edukim Fizik dhe Sporte, Infermierinë e Përgjithshme, por edhe Inxhinieri Informatike. Është një program dual, të cilin ne ofrojmë në bashkëpunim me Universitetin e Tiranës, me Universitetin Politeknik të Tiranës. Interes ka edhe te programet e tjera dhe ne i ftojmë të gjithë maturantët deri më datën 8 shtator, ku mbyllet dhe raundi i parë i regjistrimeve, për të zgjedhur Universitetin “Fan S. Noli” dhe programet që ne ofrojmë”, tha Xhuliana Sadikaj, specialiste Alumni.
Aplikantët fitues tregojnë programet e studimit që kanë zgjedhur dhe arsyet që i kanë shtyrë të preferojnë Universitetin “Fan S. Noli” për vijimin e arsimit të lartë.
“Unë jam regjistruar për Infermier dhe më pëlqen, domethënë, më ka pëlqyer që e vogël si profesion dhe e vendosa ta vazhdoj këtu.”
“Po mendoj se është një zgjedhje ideale dhe jam më afër shtëpisë për të gjitha gjërat.”
“Kam zgjedhur Teknologji Ushqimore. Jam e pasionuar pas lëndëve shkencore dhe më pëlqejnë dhe mendoj se është një degë që do ecë përpara.”
“Jam regjistruar në degën e Edukim Fizik dhe Sporte. Më pëlqen shumë sepse jam marrë me sport goxha vite dhe kam zgjedhur Universitetin e Korçës sepse kam miqtë e mi dhe familjarët këtu.”, shprehen ata.
Regjistrimet vijojnë pranë ambienteve të universitetit, ndërsa maturantët duhet të respektojnë afatet për të siguruar vendin në programet e studimit ku janë shpallur fitues.
