Bujar Nishani ka komentuar situatën në të cilën ndodhet vendi aktualisht. I ftuar në emisionin “Kjo Javë”, sipas Nishanit situata e krijuar është e paprecedentë, ndërsa shton se vendi është në pragun e një krize financiare.
“Situata është e vështirë dhe e paprecedentë. Nuk është problemi që kreu i maxhorancës ka dashur të e eleminojë opozitë, ai ka 6 vite që energjitë i ka përqëndruar në eliminimin e opozitës, jo në mirëqenien e popullit.
Një personazh i rritur dhe i formuar me një sjellje si pas 15 vitesh, që kërkon ta zhbëjë opozitën. Opozita ka bërë një zgjedhje të mençur. Opozita duhet ta rrisë presionin e saj ndaj një njeriu.
Jemi në pragun e një krize financiare, tregu financiar po shkon drejt një kolapsi. Nëse shqiptarët pas dy muajsh nuk do të marrin dot rrogat e pensionet, do të rritet irritimi”, tha Nishani.
Sa i takon krizës, Nishani thotë se padyshim zgjidhja e saj do të jetë politike.
“Isha president i Republikës në marrëveshjen e 2017, mu kërkua që t’i prisja në zyrë e të ndërmjetësoja.
Pashë që qeveria nuk kishte seriozitet në atë çka shtrohej në tryezë dhe marrëveshja u arrit jashtë zyrës së presidentit.
Por gjithsesi, institucioni i presidentit të Republikës mbetet i rëndësishëm dhe i gatshëm për të lehtësuar gjetjen e zgjidhjes.
Por unë mendoj që ajo që ndodhi në 2017 është një mësim i madh dhe kërkon garanci të forta, ndoshta përtej institucionit të presidentit, nuk mund ta përjashtosh institucionin, por janë çështje që mbeten nga vullneti politik.
Kryeministri duhet të largohet nga rruga, dhe duhet të krijojë besueshmëri.
Brenda PS ka institucione grupime e individë që mund të krijojnë besueshmërinë e një dialogu me opozitën.
Nuk mendoj se presidenti është i panevojshëm, duke pasur parasysh eksperiencën time dhe krizën sot mund të kërkohen palë përtej presidentit të Republikës“, u shpreh Nishani.
/a.meta
