Presidenti Bujar Nishani në takimin me studentët e ekselencës dhe dekanët në përkujtimin e 25 vjetorit të rënies së regjimit komunist në Shqipëri ka apeluar për hetimin e krimeve të komunizmit për të vënë në vend drejtësinë.
“U vranë me plumb pas koke, u varrosën të gjithë në një varr, pa hetim dhe pa gjyq. Nuk janë histori dimri, apo shfaqje, histori urrejtjesh mes klasave këto janë dëshmi dhe dokumente, janë kudo në çdo arkiv. Këto akte a kanë dallim nga aktet në Paris apo gjetkë ku dikush ekzekutohet se ka zgjedhur një mënyrë jetese të lirë… A meritojnë të hetohen, jo për hakmarrje, jo për revansh por për drejtësi. Janë me qinrda të rinj që janë ekzekutuar në kufi vetëm sepse tentonin të dilnin nga vendi, pasi ekzekutoheshin, ekspozoheshin nëpër qytet…Kjo ka ndodhur në Shqipëri, në Europë. Por edhe 7 mijë të tjerë vdiqën për shkak të mungesës së kurimit në kampet e internimit. Musine Kokaliari u ndesh me një sëmundje, a mund ti mohohet mjeku, kurimi? Asaj iu refuzua për t’ja përshpejtuar vdekjen. Ajo është vetëm 1 nga mbi 7 mijë që vdiqën”.
Nishani tha se demokracia mbetet një sfidë e madhe e shoqërisë, e cila nuk duhet ta harrojë të kaluarën. “Ne duhet të transmetojmë mos-harresën në brezat e ardhshëm”, tha presidenti.
