Presidenti Bujar Nishani e ka cilësuar vendosjen e bunkierit nga ana e qeverisë, si një formë dhune të dënueshme, njëlloj ashtu si edhe vetë dhuna që ushtruan protestuesit duke e djegur atë më 8 dhjetor. Në një intervistë për Tv Klan dhe ABCnews, Nishani tha se qeveria ka instaluar në kundërshtim me ligjin bunkierin.
“E drejta e protestës është një e drejtë e patjetërsueshme e opozitës dhe e çdo grupimi tjetër shoqëror që e ndjen të nevojshme të ngrejë zërin apo të paraqesë pikëpamjet e tij kundërshtuese, oponente ndaj një çështje të caktuar.
Kam qenë edhe në të shkuarën në mënyrë të qartë kundër dhunës dhe vazhdoj të mbetem kundër dhunës dhe dua të theksoj kundër çdo lloj forme të dhunës pasi ka një dhunë që mund të ushtrohet në rrugë përmes hedhjes së gurëve, dhunë që ushtrohet përmes institucioneve të ndryshme, përmes kufizimit të së drejtës që i bëhet individit, i bëhet përfaqësimit, institucioneve, grupimeve të ndryshme, edhe kjo është një formë dhune.
Vendosja e bunkerit në atë vend, në kundërshtim të plotë me legjislacionin e vendit është një formë dhune, por gjithsesi unë kam adresuar mendimin dhe gjykimin tim edhe tek opozita, tek çdo qytetar i vendit që nuk është rruga e duhur për t’ju përgjigjur dhunës me dhunë.
Ka forma dhe mënyra të tillë të cilat shoqëria duhet të prezantojë zërin e saj, pikëpamjet e saj në mënyrë të tillë që sa më të organizuar dhe pa dyshim me valencë të lartë civilizimi dhe qytetarie të dënojmë çdo formë të dhunës që mund të shfaqet qoftë në rrugë, qoftë në mentalitet, qoftë në institucion dhe në çdo formë tjetër të saj”, thotë Nishani.
