Presidenti i Republikës Bujar Nishani ka shprehur ngushëllimet e tij për rënien në detyrë të kreut të FNSH-së në Shkodër Simon Gjeta. Në mesazhin e tij, Nishani shprehet se vrasja e Gjetës është një lajm i rëndë jo vetëm për familjen por për të gjithë shqiptarët.
Presidenti teksa shpreh ngushëllimet e tij, thekson se dënon ashpërsisht këtë akt gjakatar ndërsa mbështet punën e Policisë së Shtetit për ruajtjen e rendit dhe të sigurisë.
Mesazhi ngushëllues i Presidentit:
“Të dashur anëtarë të familjes Gjeta!
Lajmi i rëndë për ndarjen e parakohshme dhe tragjike nga jeta të komandantit të FNSH-së në Shkodër, duke rënë në krye të detyrës, është tejet i rëndë jo vetëm për ju, por edhe për të gjithë shqiptarët.
Në këto momente të dhimbshme, më lejoni që në emrin tim dhe të familjes sime si dhe të mbarë qytetarëve shqiptarë, t’ju përcjell ngushëllimet më të sinqerta për humbjen e pazëvendësueshme të bashkëshortit dhe babait të dashur, Simonit tuaj të shtrenjtë.
Në cilësinë e Kreut të Shtetit duke dënuar ashpërsisht aktin gjakatar, u bëj thirrje Policisë së Shtetit dhe organeve ligjzbatuese që të punojnë pareshtur pavarësisht nga ngjarja e rëndë dhe tronditëse, në luftën e tyre të përditshme kundër krimit.
Prehu në paqe të përjetshme Komandant Simoni!”
