Presidenti Bujar Nishani nëpërmjet një mesazhi të bërë publik, shpreh keqardhjen e thellë dhe solidaritetin, edhe në emër të qytetarëve shqiptarë për viktimat dhe të plagosurit nga akti terrorist i mbrëmshëm në Londër që u mori jetën disa qytetarëve të pafajshëm britanikë duke lënduar disa dhjetëra të tjerë.
Ky është njoftimi i Presidencës sipas së cilit, Nishani dënon forcërisht aktet barbare dhe të pashpirt të terroristëve dhe ekstremistëve. Në njoftimin për shtyp thuhet se Presidenti Bujar Nishani shpreh besimin se vlerat e patjetërsueshme të demokracisë, lirisë dhe civilizimit do të triumfojnë gjithmonë mbi veprime të tilla çnjerëzore. /b.d
