Transparenca mbi fatin e Sali Berishës është detyrimi që Lulzim Basha ka ndaj partisë dhe elektoratit, ndaj dhe zërat që paralajmërojnë rrezikun e përçarjes së PD-së nuk e bindin Bujar Nishanin.
Ish-kryetari i Këshillit Kombëtar, i larguar para kohe nga kjo detyrë për shkak të kritikave që shprehu ndaj kryetarit Basha, shpjegon për A2 CNN se Partisë Demokratike i kanoset një rrezik më i madh:
“Mua nuk më shqetëson impakti i një individi, por largimi gjithmonë e më shumë i elektoratit dhe mungesa gjithmonë e më shumë e elektoratit tek Partia Demokratike”, tha ai.
Në një intervistë për A2 CNN, Nishani është i mendimit se Basha po shfrytëzon edhe përplasjen e Sali Berishës me Shtetet e Bashkuara të Amerikës për të larguar vëmendjen nga disfata e 25 Prillit:
“Duke qenë se dështoi në formë spektakolare, dëshiron që të largojë vëmendjen”.
Sipas tij, kjo i shkon për shtat edhe kryeministrit Edi Rama: “Rama ka si interes të ketë një opozitë të dobët”.
I pyetur mbi zgjedhjen e Mark Markut për t’u larguar nga partia me qëllim që opozitarizmin ta fokusonte kundër qeverisë Rama, Nishani shpjegon ku ndahet me ish-drejtuesin politik të Lezhës, që gjithashtu nuk i kurseu kritikat ndaj Bashës: “E keqja është qeveria, por që të largohet ajo duhen mekanizma, dhe mekanizmat mungojnë”.
Nuk preferon të komentojë ekipin e zgjedhur nga Basha për opozitën përballë Ramës, duke nënvizuar se më të rëndësishme se emrat janë parimet, ndërsa lëvizjet në kampin kundërshtar i sheh si taktika të kryesocialistit në funksion të manipulimit të zgjedhjeve të ardhshme.
/m.j
