Dy persona, një burrë dhe një grua, janë arrestuar në Nicë, pasi dyshohet se kanë lidhje me sulmin gjatë Festës së Bastijes, ku mbetën të vrarë 84 persona, dhe u plagosën dhjetëra të tjerë.
Ndërkaq, siti itele.fr ka bërë të ditur se dy të arrestuarit e fundit janë një çift shqiptarësh. Ata akuzohen se i kanë dhënë shoferit të kamionit armën me të cilën ai shtiu nga dritarja.
I njëjti lajm është pohuar edhe nga britanikja Daily Mail, e cila citon televizionin BFM TV, që jep edhe hollësi për armën e përdorur nga kamionisti tashmë i vrarë nga policia, pistoletë automatike, 7.65 mm.
Sipas mediave ndërkombëtare, arrestimet e orëve të fundit e çojnë në shtatë numrin e atyre që janë vënë prapa hekurave si të dyshuar në lidhje me sulmin vdekjeprurës që tronditi botën.
Disa ditë më parë, gjatë Festës së Bastijes, i riu tunizian Mohamed Lahouaiej Bouhlel, e drejtoi kamionin e tij mbi turmën e njerëzve duke i shtypur ata.
Shoferi u qëllua për vdekje nga policia, ndërsa pak më vonë i ashtuquajturi Shteti Islamik mori përsipër sulmin.
