Ka nisur protesta kombëtare e organizuar nga Partia Demokratike përpara Kryeministrisë.
Kreu i PD Sali Berisha ka dalë nga selia e PD i ndjekur nga deputetët dhe anëtarët e PD.
PD kërkon me protestën e sotme dorëheqjen e kryeministrit Edi Rama dhe zëvendëskryeministres Belinda Balluku.
Më parë në një postim në rrjetet sociale, Berisha iu drejtua me një mesazh qytetarëve ku e quajti ditën e sotme, si ditën kur populli opozitar i bën gjyqin kreut të qeverisë.
“Sot është dita e guximit qytetar. Dita kur populli opozitar i bën gjyqin kryehajdutit, kryeministrit të lidhur me banditë, trafikantë dhe vrasës. Është dita e ngadhënjimit mbi të keqen që ka mbërthyer Shqipërinë”, shkruan ai.
Më parë Berisha ka kërkuar që të ndalohet presioni mbi drejtësinë, çka sipas tij ka ndodhur me rastin e Belinda Ballukut. Ai është shprehur se kryeministri po ushtron presion mbi SPAK dhe Gjykatën Kushtetuese, ku edhe shqyrtohet kërkesa e Këshillit të Ministrave mbi vendimin e GJKKO për pezullimin nga detyra të Ballukut.
