Kuvendi i Shqipërisë do të nisë sot zyrtarish sesionin e ri. Pas mbi 2 muaj pushime, deputetët e Shqipërisë do të mblidhen sot në Kuvend në një seancë që pritet të jetë e ndezur me debate të forta mes mazhorancës dhe opozitës.
Seanca do të nisë shqyrtimin e raportut të Këshillit të Mandateve i cili dha autorizimin për arrestimin e deputetit të PS Atmando Prenga, i vënë nën akuza të rënda pas ngjarjes së dhunshme në Laç pak ditë më parë.
Vendimi i Këshillit për Rregulloren, Mandatet dhe Imunitetin erdhi pasi deputetët dëgjuan argumentet e prokurorëve Altin Biraj dhe Arben Kraja, por dhe mbrojtjen e bërë nga avokati i deputetit, Armando Prenga, Baftjar Rusi.
Por për shkak të akuzave të opozitës, pritet që debati të jetë i fortë në sallë. Në Kuvend gjithashtu do të miratohen edhe Programi i Punës për periudhën 7 Shtator – 5 Nëntor si dhe Kalendari 3 javor i punimeve.
Rendi i ditës:
1. Shqyrtimi i njoftimit të Prokurorit të Përgjithshëm të Republikës së Shqipërisë për
arrestimin në flagrancë të deputetit të Kuvendit të Shqipërisë, zotit Armando Prenga dhe i kërkesës për dhënien e autorizimit për arrestimin e deputetit të Kuvendit të Shqipërisë Armando Prenga (nenet 13, 118 dhe 119 të Rregullores)
2. Miratimi i procesverbalit të seancës plenare, datë, 27.07.2015 (neni 44, pika 2 e Rregullores)
3. Njoftimi i projektligjeve të depozituara në Kuvend (neni 44, pika 3 e Rregullores)
4. Miratimi i Programit të Punës të Kuvendit për periudhën 7 shtator – 5 nëntor 2015 (neni 26, pikat 5, 6 të Rregullores)
5. Miratimi i Kalendarit 3 javor ( 7 – 24 shtator 2015) të punimeve të Kuvendit (neni 27, pikat 3, 4 të Rregullores)
