Këtë të mërkurë, 1 prill, ka vijuar seanca gjyqësore në Apelin e Larisës, Greqi, për tragjedinë hekurudhore të Tempit.
Para trupës gjykuese ka nisur dëshmia e personave, të cilët po merren në pyetje një e nga një lidhur me ngjarjen tragjike që shkaktoi 57 viktima.
Të afërmit e viktimave nuk u lejuan nga uniformat blu për të hyrë të gjithë në sallën e gjyqit. Kjo shkaktoi përplasje në ambientet e jashtme të gjykatës, mes tyre ishte dhe shqiptari Panos Ruçi, i cili humbi djalin, Denis Ruçin.
Ruçi përfundoi në spital për shkak të hipertensionit.
Avokatja e tij mbrojtëse, Zoe Konstantopoulou, njëherazi dhe deputete, u shpreh se Ruçi u dhunua nga gjashtë oficerë policie.
“E paimagjinueshme. Më vjen shumë keq. Mirela Ruçi u pengua të më afrohej në sallën e gjyqit. Unë u pengova gjithashtu, që me urdhër të gjykatës t’i afrohesha gruas që përfaqësoj. Panos Ruçi u dhunua nga gjashtë oficerë policie”, u shpreh Konstantopoulou.
Sakaq, rreth orës 13:40 (me orën greke), Ruçi doli nga spitali në gjendje të stabilizuar.
Ndërkohë, në sallën e gjyqit vijojnë deklaratat e të pranishmeve.
Kujtojmë se tragjedia e Tempit ndodhi më datë 28 shkurt 2023, rreth orës 23:21. Përplasja “kokë më kokë” midis një treni pasagjerësh që vinte nga Athina për në Selanik dhe një treni mallrash që udhëtonte nga veriu drejt Larisës i mori jetën 57 personave.
Në trenin e udhëtarëve ishin në total 350 individë, ku shumë u plagosën. Familjarët e viktimave kanë kërkuar drejtësi mbi ngjarjen. Që prej kohës kur ka ndodhur aksidenti, protesta të shumta janë zhvilluar në mbarë Greqinë.
