Pas verifikimit të materialeve zgjedhore të 126 kutive në qarkun e Durrësit, ka nisur procesi i rinumërimit të votave. Sipas të dhënave të KQZ, deri më tani janë hapur 11 nga 290 kuti që do të rihapen brenda vendit, ku janë vënë re dhe gabimet e para.
Do të rihapen gjithashtu edhe 85 kuti që i përkasin diasporës së këtij qarku.
PD-së i hiqet një votë ndërsa PS-së 3 vota. Nismës Shqipëria Bëhet i hiqet gjithashtu një votë.
Në këtë qark, beteja bëhet brenda PD, mes kandidatit Aulon Kalaja dhe Arjan Ndojës. Ish-prokurori fitoi me një diferencë prej 1047 votash në numërimin fillestar. Nga këto 11 kuti të rinumëruara, rezulton se Ndoja ka humbur 3 vota ndërsa Kalasë i shtohet 1 votë.
Edhe në PS vihen re gabime brenda kandidatëve. 6 vota i hiqen Erjon Xhilit, ndërsa nga një votë iu shtohet Indrit Gjokës, Gentian Hillës, Entela Hoxhës, Jona Osmanit dhe Alban Xhelilit.
Aulon Kalaja kërkoi rinumërim votash me pretendimin se i janë trafikuar vota brenda partisë. Pritet të shihet nëse hapja e pjesshme e kutive të Durrësit do t’i japë vota në favor të tij, për t’i marrë mandatin Ndojës.
Kalaja protestoi edhe dy ditë më parë para Pallatit të Sportit “Farie Hoti”, ku po rinumëroheshin kutitë e fundit të Fierit, duke kërkuar korrektësi nga KAS dhe rinumërim të plotë të Durrësit. Kërkoi gjithashtu paralelisht edhe këqyrjen e pamjeve filmike me pretendimin se i janë transferuar votat brenda partisë.
Rinumërimi i Durrësit vjen pas përfundimit të procesit të Fierit, i cili prodhoi ndryshime.
Zegjine Çaushi humbi dhe rifitoi mandatin brenda një dite. Ajo u mund nga kolegia socialiste Maldrita Bardho me një diferencë prej 10 votash nga rinumërimi, por kjo e fundit reagoi dhe tha se do t’ia linte mandatin Çaushit.
