Nis rehabilitimi dhe veshja me asfalt e aksit rrugor Reps (Rotonda) – Fushë Arrëz (K/Hadroit), pjesë e aksit kombëtar Kukës-Fushë Arrëz-Tiranë. Projekti për rikonstruksionin e rrugës është financuar nga Fondi Shqiptar i Zhvillimit, që tashmë është shndërruar në levën kryesore te menaxhimit të investimeve publike në rrugë.
Rruga e degraduar totalisht, nuk ka njohur asnjë investim prej 27 vitesh, duke u kthyer në një makth për mijëra banorë të rrethit të Pukës dhe Mirditës. Në ceremoninë e nisjes së punimeve ishin të pranishëm, ministri i Jashtëm, Ditmir Bushati dhe deputeti Pjerin Ndreu.
“Sot për banorët e Fushë Arrëzit, Gjegjanit dhe Repsit është një ditë e bukur. Filloi investimi për shtrimin e rrugës që për shumë vite ishte lënë në harresë. Ne nuk dimë të gënjejmë. Ne nuk jemi më të mirët, por më të mirë se ne nuk ka”, shkruan Ndreu në facebook
Rruga Reps-Gjegjan-Fushë Arrëz, që dikur ishte arteria e vetme që lidhte Shqipërinë me Kosovën, është tërësisht e amortizuar. Me ndërtimin e “Rrugës së Kombit”, ky aks u la plotësisht në harresë. Mijëra banorë të kësaj zonë ka ngritur me dhjetëra herë shqetësimin për mungesën e kësaj rruge.
Ky aks rrugor, edhe pse rreth 26 km, është cilësuar si “rruga e vdekjes”, për shkak të aksidenteve tragjike që kanë ndodhur. Rikonstruksioni i kësaj rrugë, është padyshim një lajm i mirë dhe pritet t’i japë një hov të ri kësaj zone. Shumë nga banorët janë detyruar të largohen nga kjo zonë për shkak të mungesës së rrugës dhe shërbimeve të tjera.
Për asfaltimin e rrugës është lëvruar një fond me vlerë 924 502 776 lekë dhe rikonstruksioni i plotë pritet të përfundojë në tetor të vitit 2018./javanews.al/Al.Çu
