Ministri i Transportit dhe Infrastrukturës, Edmond Haxhinasto inspektoi të premten punimet për realizimin e sinjalistikës vertikale dhe vijëzimet në aksin rrugor Rrogozhinë-Kapshticë, duke ndaluar në segmentin Maliq- Korçë.
Haxhinasto tha se në këtë aks po bëhet një investim i rëndësishëm për sigurisë rrugore, që shkon rreth 1 milard lekë, për të përmirësuar dhe për ta sjellë në një standard europian sinjalistikën e kësaj rruge. Haxhinasto deklaroi se siguria rrugore është prioritet, dhe prandaj një pjesë e konsiderueshme e burimeve financiare të ARRSH po shkojnë për këtë qëllim.
“Kemi kërkuar që të zbatohet me rigorozitet projekti i kësaj rruge. Standardi i rrugëve tona ka nevojë për rivlerësim, me qëllim që të mos krijojë asnjë pengesë për aktivitetin ekonomik dhe për zonat e banuara. Përshtatja e projekteve duke marrë parasysh nevojat e komunitetit duhet të gjejë zgjidhje nga ARRSH, nga kompania kontraktore në bashkëpunim edhe me pushtetin vendor”, deklaroi ministri.
Duke marrë shkas nga dëmtimet që i janë bërë sinjalistikës ndërsa projekti është duke u realizuar, Haxhinasto i bëri thirrje banorëve të zonës, që të mos e dëmtojnë sinjalistikën pasi këto dëmtime rrisin rrezikun për aksidente.
“Shpesh herë po vihet re fenomeni i vjedhjes së sinjalistikës. Ky është një krim jo vetëm për ndërhyrjen e padrejtë në sigurinë e rrugës, por është një prekje e parave publike, dhe si e tillë duhet ndëshkuar mjaft rreptë. Heqja e një tabele që paralajmëron një kthesë ose një rrezik, krijon kushtet për një aksident me pasoja të rënda. I bëj thirrje banorëve të kësaj zone dhe qytetarëve të gjithë vendit, të jenë të përgjegjshëm dhe të mos prekin sinjalistikën”, tha Haxhiansto.
Ai po ashtu apeloi drejtuesit e automjeteve, që të respektojnë normat e lëvizjes. Sipas tij, ndonëse rrugët janë përmirësuar, është investuar shumë në përmirësimin e standarteve dhe sigurisë, drejtuesit e automjeteve nuk mund të mos respektojnë kufizimet e shpejtësisë. Nga statistikat, tha ministri, rezulton që periudha e korrik-gusht, shënon rritje të aksidenteve, ku përfshihen automjetet e emigrantëve./a.k
