Nisi sot nga zbatimi projekti për rehabilitimin e sheshit qendror të qytetit të Kukësit, duke e shndërruar atë në një hapësirë të kujtesës historike dhe të frymëzimit për të ardhmen.
Ndërkohë duke sjellë pamje nga nisja e punimeve në sheshin e qytetit të Kukësit, Kryeministri Edi Rama shkruan në rrjetin social “Facebook” se, “edhe në Kukës nis Rilindja Urbane me projektin e transformimit të qendrës nga udhëkryq bosh, në hapësirë për qytetarët”.
Gjatë mitingut elektoral në qytetin e Kukësit, 4 ditë më parë, Kryeministri Rama paralajmëroi nisjen e këtij projekti. “Të dielën, në këtë shesh çelet kantieri i parë i madh i Rilindjes Urbane të Kukësit. Projekti i përbashkët i Bashkisë së Kukësit dhe i kryetarit të saj, me Fondin e Zhvillimit të Rajoneve, do të marrë jetë, duke e kthyer këtë hapësirë në një hapësirë të kujtesës historike dhe të frymëzimit për të ardhmen. Në një hapësirë ku do të jenë së bashku Skënderbeu dhe kujtesa e atij momenti që e vuri Kukësin në qendër të historisë europiane, që e bëri Kukësin dhomën e parë të mikpritjes shqiptare për qindra e mijëra shqiptarë të Kosovës, që u detyruan të shpërngulen nga shtëpitë e tyre, nën thundrën e Sllobodan Milosheviçit”, deklaroi Rama gjatë mitingut elektoral, të disa ditëve më parë.
Ai u shpreh se “ky do të jetë sheshi ku do t’i bëhet jehonë historisë, por njëkohësisht do t’i bëhet edhe nxitje ëndrrave dhe shpresave të të gjithë të rejave dhe të rinjve, që nuk do vijnë më vërdallë si në një udhëkryq në shkretëtirë, por do të gjejnë e takojnë këtu, njëri-tjetrin, si në çdo shesh të çdo qyteti europian mesdhetar”.
Kryeministri siguroi se “sheshi i Kukësit do të jetë një nga sheshet më të bukur të Shqipërisë”. ATA
