Ka nisur pelegrinazhi tradicional në malin e Tomorrit, ku mijëra besimtarë bektashinj nga Shqipëria dhe vende të ndryshme të botës janë nisur drejt Teqesë së Kulmakut për të marrë pjesë në festën e Baba Tomorrit.
Festa tradicionale zhvillohet nga 20 deri më 25 gusht dhe përbën një nga ngjarjet më të rëndësishme shpirtërore, kulturore dhe tradicionale për komunitetin bektashi. Gjatë këtyre ditëve, mali i Tomorrit kthehet në një destinacion të madh pelegrinazhi, me besimtarë që qëndrojnë për disa ditë në zonë, ngrenë çadrat dhe marrin pjesë në ceremonitë fetare.
Fluksi i madh i pelegrinëve ka sjellë edhe ngarkesë të shtuar në rrugët që të çojnë drejt malit të Tomorrit. Qindra automjete kanë krijuar trafik dhe vështirësi në qarkullim.
Për shkak të numrit të madh të vizitorëve dhe automjeteve, Policia Rrugore ka shtuar kontrollet dhe masat për menaxhimin e trafikut. Shërbimet policore janë të angazhuara për të orientuar drejtuesit e automjeteve, për të shmangur bllokimet dhe për të garantuar sigurinë e qytetarëve.
Mali i Tomorrit pritet të vijojë të presë një numër të madh besimtarësh gjatë gjithë ditëve të festës. Krahas ceremonive fetare, pelegrinazhi mbetet edhe një moment i rëndësishëm për ruajtjen dhe përcjelljen e traditave kulturore dhe shpirtërore të kësaj zone.
Festa e Baba Tomorrit zhvillohet çdo vit në malin e shenjtë të Tomorrit.
