Nis ofensiva për të rimarrë Mosulin, qyteti i dytë më i madh në Irak i pushtuar nga ISIS. Kryeministri i Irakut, Haider alAbadi, tha se operacioni ushtarak për rikthimin e qytetit të Mosulit nga i ashtuquajturi Shtet Islamik ka nisur.
“Koha e fitores erdhi dhe operacioni për të çliruar Mosulin nisi” u shpreh al Abadi.
Ofensiva nga forcat kurde Peshmerga, trupat qeveritare dhe forcat aleate po mbështetet nga një koalicion ndërkombëtar, i udhëhequr nga Shtetet e Bashkuara.
Mosuli, qyteti i dytë më i madh i Irakut, është nën kontrollin e grupit militant Shteti Islamik qysh në qershor të vitit 2014.
Kombet e Bashkuara kanë shprehur “shqetësim të madh” për sigurinë e rreth 1.5 milion banorëve në zonë. Mosuli është bastioni i fundit i Shtetit Islamik në Irak, shkruan panorama.
“Sot, deklaroj fillimin e operacioneve heroike për çlirim nga Daeshi”, tha kryeministri Abadi, duke iu referuar grupit militant me emrin arab./a.k
