Të martën në mëngjes, Shqipëria do të shndërrohet në arenën kryesore të një prej stërvitjeve më të mëdha ushtarake të zhvilluara ndonjëherë në Ballkanin Perëndimor dhe më gjerë.
“Defender Europe 2025”, një operacion i orkestruar nga Komanda Evropiane e Shteteve të Bashkuara (USEUCOM), do të sjellë në terren dhjetëra mijëra trupa nga SHBA, vendet anëtare të NATO-s dhe partnerë strategjikë, në një demonstrim të fuqishëm të bashkëpunimit dhe gatishmërisë ushtarake ndërkombëtare.
Stërvitja do të nisë nesër, me marshimin e trupave nga garnizoni ushtarak i Zall-Herrit drejt Qendrës së Stërvitjes në Bizë, ku do të zhvillohen fazat më intensive të manovrave ushtarake. Burime nga Ministria e Mbrojtjes bëjnë me dije se skenarët e parashikuara përfshijnë operacione mësymëse dhe mbrojtëse në terrene të vështira, stërvitje për dislokime të shpejta, mbrojtje të infrastrukturës kritike dhe reagim ndaj kërcënimeve hibride.
“Defender Europe 25” është konceptuar në përputhje me Nenin 5 të Traktatit të NATO-s, i cili garanton mbrojtje kolektive ndaj çdo sulmi të jashtëm ndaj një shteti anëtar. Në këtë kontekst, pjesëmarrja e Shqipërisë dhe Kosova si vend mikpritës, nuk është thjesht një formalitet logjistik, por një shenjë e qartë e rolit strategjik që këto vende po luajnë në arkitekturën e re të sigurisë euroatlantike.
Fokusi i kësaj stërvitjeje është vënia në provë e ndërveprimit të forcave të vendeve aleate, koordinimi në kohë reale dhe rritja e kapaciteteve për përballimin e kërcënimeve potenciale në një ambient operacional gjithnjë e më kompleks. Ndryshe nga vitet e kaluara, këtë herë do të ketë theks të veçantë mbi logjistikën e avancuar, sigurinë kibernetike dhe përballimin e krizave të përmasave të mëdha.
Krahas Shqipërisë, një tjetër qendër strategjike e stërvitjes është Kosova, ku trupat do të trajnohen për skenarë të sigurisë së kufijve, menaxhimit të emergjencave dhe dislokimit të shpejtë të forcave. Sipas burimeve të NATO-s, ndërhyrja e përbashkët në skenarë simulative të krizave do të forcojë ndjeshëm kohezionin ndërmjet ushtrive pjesëmarrëse.
Kjo është hera e katërt që Shqipëria luan një rol qendror në serinë e stërvitjeve “Defender Europe”, duke konfirmuar statusin e saj si një aleate e besueshme në kufirin jugor të NATO-s. Sipas Komandës së Forcave të Armatosura Shqiptare, përfshirja e vendit tonë në këtë megaoperacion është një dëshmi e besimit të partnerëve ndërkombëtarë, por edhe një provë e transformimit që ushtria shqiptare ka pësuar në këto vite, nga një strukturë e vjetër dhe e ngadaltë, në një forcë moderne dhe të integruar.
